كود سبور//

عبرو لاعبين المنتخب الوطني المغربي لأقل من 17 عام، على الرغبة ديالهم القوية فالفوز على منتخب ايران غدا الثلاثاء، ضمن ثمن نهائي كاس العالم إندونيسا U17، واكدو بلي باغيين يديرو بحال إنجاز المنتخب الأول فمونديال 2022، وعلاش لا يربحو اللقب.

وتحدث سيف الدين شلاغمو لاعب المنتخب الوطني المغربي لأقل من 17 عام فتصريح للموقع الرسمي للجامعة الملكية المغربية قبل ماتش إيران وقال: “باغيين نديرو بحال ملحمة المنتخب الوطني الأول فمونديال 2022، ونوصلو للفينال وعلاش لا نربحو اللقب ونشرفو الشعب المغربي والكورة المغربية احسن تشريف”.

وكمل شلاغمو: “الماتش ضد إيران فثمن نهائي كاس العالم صعيب، ولكن حنا واجدين وخدمنا مع الطاقم التقني ديالنا على نقاط قوة وضعف المنتخب الإيراني وغنخدمو عليهم ونحاولو نماركيو الفرص اللي غيجيونا ونساليو الماتش بكري”.

وقال الشبل محمد أمين الزرهوني حتى هو: “ماتش بين منتخبين مزيانين، وعندنا الثقة فالكروب ديالنا باش نديرو ماتش مزيان وبريتم عالي ونربحو على قبل الشعب المغربي”.