كود سبور//

تأهل المنتخب الوطني المغربي الأولمبي لدومي فينال دورة الألعاب الاولمبية باريس2024، لأول مرة فالتاريخ ديالو، فإنجاز جديد للكورة المغربية، قرب الأسود من حلم التتويج بميدالية فمنافسات كرة القدم.

ونجح المنتخب الوطني المغربي الاولمبي فتحقيق التأهل للدومي فينال، بعدما ربح منتخب الميريكان فربع النهائي اليوم الجمعة فتيران بارك دي برانس فالعاصمة الفرنسية باريس.

وسالا الماتش بين المنتخب المغربي والاولمبي والميريكان بنتيجة 4 لزيرو لمصلحة الأسود، وماركا الهدف الاول للمنتخب المغربي سفيان رحيمي فالدقيقة 28 من بيلانتي، وعزز الرصيد ديالو كهداف أولمبياد باريس حتى لدابا بـ5 أهداف، وأصبح بهذه الحصيلة المميزة ثالث أحسن هداف إفريقي فنسخة واحدة بعد المصري مصطفى رياض بـ8 أهداف، والزامبي كالوشا بواليا، والغاني كوامي أيو اللي عندهم 6 أهداف لكل واحد منهم.

وقدر إلياس أخوماش يزيد الهدف الثاني للمنتخب المغربي من بعدما عطاه عبد الصمد الزلزولي أسيست، وصيفط أخوماش الكورة نيشان لمرمى الميريكان فالدقيقة 63، وزاد عزز أشرف حكيمي النتيجة للأسود بهدف ثالث، ملي شد الكورة واخترق بها وسط التيران حتى قرب للشبكة ديال الميريكان وسجل الهدف فالدقيقة 70، وكانت فرحة كبيرة له حيث ماركا مع المغرب فتيران بارك دي برانس اللي كايلعب فيه ديما مع الفريق ديالو باريس سان جرمان الفرنسي، وزاد مهدي موهوب الهدف الرابع للمغرب فالدقيقة 90 من بينالتي تحصل عليه إلياس أخوماش اللي ضرب الكورة ولمسها مدافع ميريكاني بيديه.

وبهذه النتيجة تأهل المنتخب الوطني المغربي إلى دومي فينال أولمبياد باريس2024، وغايلعب مع المتأهل من الدومي فينال الثاني بين إسبانيا والجابون