كود سبور//

قدر المنتخب الوطني المغربي يخرج رابح فالشوط الأول من الماتش ديالو ضد منتخب تنزانيا، اللي بادي اليوم الثلاثاء فالعاصمة التنزانية دار السلام، ضمن الجولة الثانية من إقصائيات كأس العالم 2026.

وسالا الشوط الأول من ماتش المنتخب المغربي وتنزانيا بنتيجة واحد لزيرو لمصلحة الأسود، بهدف ماركاه النجم حكيم زياش فالدقيقة 28، بعدما سدد كورة قوية وصعيبة من بعيد ضربت  فالأرض ودخلت وما لقا كول تنزانيا ما يشد فيها.

للإشارة فالمنتخب الوطني المغربي كان يقدر يخرج رابح بأكثر من هدف واحد، حيث أشرف حكيمي ضيع ضربة جزاء مع بداية الماتش تحصل عليها امين العدلي، ولكن حكيمي ضرب اليبنالتي فالسما، والحكم حيد هدف لامين العدلي بداعي خطأ.

الشوط الأول ما عرف حتى شي خطورة من منتخب تنزاتيا على مرمى المنتخب المغربي، واللاعبين ديالو بقاو غير راحعين للوراء وميدافعو، قدام ضغط كبير من لاعبين المنتخب الوطني المغربي اللي من المنتظر يزيدو يضغطو فالشوط الثاني باش يقتلو الماتش ويكملوه مرتاحين.