گود سبور//
كيواصل المنتخب الوطني المغربي الاستعدادات بمدينة سان بيدرو الإيفوارية، تحضيرا لمشاركتو فنهائيات كأس أفريقيا للأمم اللي كتحتضنها كوت ديفوار.
وركز وليد الركراكي، مدرب المنتخب الوطني المغربي خلال الحصة التدريبية ديال البارح الاحد 15 يناير 2024، اللي تقامت على أرضية ملعب أوكست دنيس على الجوانب التكتيكية و التقنية و البدنية.
وكشف طارق تيسودالي لاعب المنتخب المغربي على الأجواء داخل ليكيب ناسيونال، وقال للموقع الرسمي ديال الجامعة الملكية المغربية لكرة القدم: “كنحس براسي مزيان وأنا فرحان حيث كاين هنا وحنا عايشين مزيان كگروب واحد ومركزين باش نديرو نتيجة مزيانة لبلادنا وكلنا متحمسين بزاف”.
وكمل تيسودالي، وقال: “كنحترمو المشجعين ديالنا بزاف وشفت عدد منهم هنا وحنا كنقدرو هذا الشي اللي كيديرو على قبلنا وباغيين نربحو هاد الكاس على قبلهم وعلى قبل المشجعين ديالنا فگاع أنحاء العالم”.
وغيبداو أسود الأطلس مشاركتهم الـ19 فكوب دافريك، بمواجهة المنتخب التانزاني ضمن منافسات الجولة الأولى للمجموعة السادسة الأربعاء الجاي.