كود سبور//

كايبان أنه كاينة ثقة قوية عند لاعبين المنتخب الوطني المغربي فالناخب الوطني وليد الركراكي على القدرة ديالو فقيادة المنتخب الوطني المغربي للتتويج بكأس إفريقيا “المغرب 2025”، لثاني مرة فتاريخ الكورة المغربية، وإهداء هذا اللقب للمغاربة بعد غياب طويل من عام 1976.

وهضر ابراهيم دياز نجم ريال مدريد الإسباني على الناخب الوطني وليد الركراكي، وقال فتصريح له لجريدة “ليكيب” الفرنسية: “الركراكي كايخلق أجواء عائلية داخل المنتخب المغربي، وقريب بزاف من اللاعبين، وكايعرف كيفاش يخرج منهم أحسن ما عندهم”، وكمل وقال: “الركراكي كايموتيفينا باش نلعبو بالقلب والعقل بجوج، وحنا دابا كنبنيو شي حوايج واعرين غاتكون إلهام للأجيال الجايين وغاتبقى إرث للمستقبل”.

أما ياسين بونو حارس عرين الأسود وگول الهلال السعودي فقال للجريدة الفرنسية على الناخب الوطني: “الصراحة الركراكي مدرب واعر فكلشي، سوا التكتيك او الجانب الإنساني وكيفاش كايجيري الفريق، وعندو دور كبير فهاد الشي اللي كانعيشوه اليوم، من خلال الشوفة والقراءة ديالو”.

الأسطورة المغربي أشرف حكيمي بطل أوروبا مع باريس سان جيرمان هضر حتى هو على وليد الركراكي، وقال فتصريح لـ “ليكيب”: “كانتيق بزاف فوليد الركراكي، حيث عارف مزيان شنو باغي، وعندو شوفة واضحة للمستقبل، وحنا كانتطورو معه وغانديرو المستحيل باش نربحو الكأس”.