كود سبور//

حقق المنتخب الوطني المغربي أول ثلاث نقاط فإقصائيات كاس إفريقيا 2026، ومن أول ماتش غيلعبو فهاد المنافسات، وهو الفوز اللي جا على منتخب تنزانيا فتيرانها بدار السلام اليوم الثلاثاء، ضمن الجولة الثانية.

قدر المنتخب الوطني المغربي يحسم الماتش أمام تنزانيا بنتيجة 2 لزيزو، من تسجيل حكيم زياش فالشوط الاول بتسديدة قوية من بعيد ماركا بها الهدف الأول فالدقيقة 28، والهدف الثاني ماركاه يوسف النصيري بعدما ضربت الكورة فواحد المدافع تنزاني، وكان حكيم زياش هو أللي بدأ الهجمة وبلال الخنوس اللي عطا الأسيست للنصيري.

والمباراة عرفت سيطرة كبيرة للمنتخب الوطني المغربي، حيث المنتخب التنزاني رجع للوراء وبقى كيدافع أمام ضغط الأسود، وكانو ليكيب ناسيونال يقدرو يخرجو بنتيجة كبر من 2 لزيرو، حيث أشرف حكيمي ضيع بيلانتي مع بدية الماتش، والحكم حيد هدف لامين عدلي، وهذا الشي من غير الفرص الاخرى اللي زكلو اللاعبين المغاربة، اللي دخلو مشادات واحد الوقت مع اللاعبين التنزانيين بسبب التدخلات الخشنة اللي كان ممكن توعت شي واحد من المنتخب المغربي، وراه كملو التنزانيين المباراة بنقص عددي بعدما تطرد واحد اللاعب ديالهم فالدقيقة 63، حيث ضرب سفيان امرابط بلا كورة.

وبهذا الرباح كيكون المنتخب الوطني المغربي رابع العالم فمونديال 2022، بصم المنتخب الوطني على بداية مزيانة فاقصائيات كاس العالم 2026، وطلع لصدارة المجموعة 5 برصيد 3 نقاط، إلى جانب زامبيا وتنزانيا والنيجر بنفس رصيد النقاط حيث النيجر ربحو زامبيا بنتيجة 2 لواحد، ثم كيجي منتخب الكونكو بزيرو نقطة.