كود سبور//

عبر الدولي المغربي أشرف حكيمي على الفرحة ديالو بتحقيق دوري أبطال أوروبا مع باريس سان جيرمان الفرنسي، وعلى الفخر ديالو بالجنسية ديالو المغربية، وبالمغاربة اللي كايشجعوه على تحقيق الأحلام ديالو.

وقال أشرف حكيمي فتصريح للموقع الرسمي ديال الجامعة الملكية المغربية لكرة القدم: “لحظة خاصة جات من ورا الخدمة اللي درنا، والجمهور يستاهل هذا التتويج بعدما تسنى سنوات طويلة، وهذا الشي كايحلم به أي لاعب، وكلشي باغي يربح دوري أبطال أوروبا، وتمتع بتحقيق هذا الحلم وكانتمنى نكمل فهذا الشي ونعطي أمل للشباب باش يخدمو على أحلامهم”.

وكمل حكيمي وقال: “فرحان بزاف وفخور بالمغاربة، الوالدين ديالي مغاربة وكنت حريص على تمثيل بلدي ديما، والجمهور المغربي ديما كايشجعني وكايعطيني القوة باش نكمل وندير داكشي اللي كانبغي، والميساج ديالي باين وهو الخدمة والاجتهاد والإيمان بالأحلام، وما نسمعوش للناس اللي كايقولو لينا إن أحلامنا ما غاديش تحقق ونركزو على الحوايج اللي يخليونا نوصلو لها”.