كود سبور//

قاد الاسطورة المغربية اشرف حكيمي، الفريق ديالو باريس سان جرمان الفرنسي، للتأهل إلى فينال شومبيونزليگ، بعدما ربحو اليوم الاربعاء أرسنال النگليزي فروتور للدومي فينال.

وسالا الماتش اللي تلعب فتيران حديقة الامرا فباريس بين باريس سان جرمان وأرسنال بنتيجة 2 لواحد لمصلحة اشرف حكيمي وصحابو، وماركا الهدف الاول للفرنسيين بواسطة فابيان رويز فالدقيقة 27، وزاد النجم اشرف حكيمي الهدف الثاني للفريق الفرنسي فالدقيقة 72 من تسديدة واعرة كادراها مزيان، قبل ما يماركيو ارسنال هدفهم الاول فالدقيقة 76، بواسطة ساكا، مع العلم ان ماتش لالي فالنگليز سالا بواحد لزيرو لمصلحة PSG.

وبهذه النتيجة تأهل النجم المغربي اشرف حكيمي والفريق ديالو باريس سان جرمان الفرنسي لفينال شومبيونزليگ، وغايلعبو ضد انتر ميلان الطالياني اللي تأهلو على حساب البارصا الاسباني، والنهائي غايكون بين الفرنسيين والطاليانيين يوم 31 ماي 2025 فتيران أليانز أرينا بمدينة ميونخ الألمانية.