كود سبور//

عبر أسطورة ألعاب القوى المغربي سفيان البقالي على الفرحة ديالو حيث ربح ثاني ميدالية ذهبية أولمبية له فالكاريير ديالو، بعدما ربح سباق 3000 متر موانع اليوم الاربعاء فأولمبياد باريس2024، وهداها للملك محمد السادس وللمغرب، وشكر العداء المغربي الاخر محمد تندوفت على الدور التكتيكي المهم اللي دار فالسباق وتسبب ففشل خطة العدائين الإثيوبيين، وهذا الشي ساهم فالفوز ديالو بالسباق وشكر المدرب ديالو وعائلتو والطاقم الطبي والجامعة ديال ألعاب القوى، حيث عاونوه على تجاوز الإصابة اللي كانت عندو والمشاركة فأولمبياد باريس، وتحقيق ثاني ذهبية أولمبية بعد أولمبياد طوكيو2020.

وهضر سفيان البقالي فتصريح له بعدما ربح الميدالية الذهبية فأولمبياد باريس2024، وقال: “أنا فرحان حيث ربحت الميدالية الثانية على التوالي فالألعاب الأولمبية بعد أولمبياد طوكيو2020، وكان الهدف الكبير ديالي هو نربح الميدالية الذهبية فأولمبياد باريس، وقدرت نحقق هذا الشي بعدما خدمت ووجدت بما فيه الكفاية وما كانتش عندي هذه السنة ساهلة خصوصا بسبب الإصابة اللي كانت عندي وقدرت نتجاوز هذا الإصابة”.

وكمل أسطورة ألعاب القوى المغربي: “كنشكر الناس اللي عاونوني والجامعة الملكية المغربية لألعاب القوى وشكرا لسيدنا على الدعم ديالو والرسائل اللي تلقيتها منو وبهاديك الرسائل باش بقيت مكمل، وفالمغرب ما كناش كانشوفو شي رياضي كايكمل المسار ديالو لهاد المدة وأنا خديت على العاتق ديالي هذا الشي، ومن 2021 وأنا كانحصد فالألقاب وفالميداليات الذهبية وجيت لباريس وكلي عزيمة باش نحقق المبتغى ديالي وهذه المرة ما كانش عليا ضغط حيث أنا البطل الاولمبي وبطل العالم 2 مرات، وهما اللي خاصهم يشوفو كيفاش يريحوني ماشي أنا”.

وأكد البقالي: “السباق اليوم ما كانش ساهل، كانت خطة اثيوبية، ولكن كانشكر الصديق ديالي محمد تندوفت طلع فالوقت المناسب، وتكلمت معه وسط السباق وقلت له حاول تدير شي حاجة، وشفتو رد الفعل ديالو وكانشكرو بزاف على المجهود اللي دار معيا، وأنا فرحان وكنهدي الميدالية ديالي لسيدنا الرياضي الأول فالمملكة وكانقوله شكرا بزاف على الدعم ديالك، وأنا فرحان بزاف حيث هديت لبلادي هاد الميدالية اللي ما كانش ساهلة خصوصا هذه السنة، حيث تعبت وكانت عندي اصابة ووصلت لمرحلة اللي قررت أنني ما غاديش نشارك فالألعاب الأولمبية ولكن قدرت نتغلب على الإصابة وكانو معيا المدرب ديالي كريم التلمساني والعائلة ديالي والطاقم الطبي والجامعة الملكية اللي ما خلاونيش وبقاو معيا وقدرت نعوض السباقات اللي ما لعبتش بلقب غالي اللي هو الأولمبياد”.