اسماء غربي – كود//

الأزمة لي كتعيشها الفنانة دنيا بطمة مع راجلها بينات على أنها مرا ونص، وقادرة تحمي حقوقها كمغربية مزوجة برجل أجنبي، وهادشي لي خلاها في أيام الحب والغرام تقرر تعطي لبناتها الجنسية المغربية.

بطمة دارت هاد الخطوة قبل ما تبدا المشاكل مع راجلها البحريني محمد الترك، لي هي دابا موضوع هضرة كثيرة تعددت الروايات فيها بين لي ربطها بالفلوس وبين لي كيرجعها لاحتمال وجود “خيانة زوجية”، وذلك في الوقت لي دنيا مكتدويش فيه فهادشي وترفض الخوض فيه في لقاءاتها الصحفية، تفاديا لتدخل جمهورها في حياتها الشخصية.

واستغلت بطمة القانون لي كيسمح باش الأم المغربية تعطي الجنسية لأولادها إلى كانت مزوجة بأجنبي، وما ضيعاتش الوقت وعطات لبناتها الجنسية المغربية.

بطمة بينات على أن محمد ترك ما مدير أعمال ما والو، والخدمة الوحيدة لي كانت عندو هي أنه راجل دنيا بطمة، تابعها للحفلات والسهرات لي كتجيبهم بسميتها وبالصوت لي عندها، ماشي هو لي كيجيبهم ليها.

والدليل على على هادشي هو أنها واخة ساستو باقة خدامة، وكاين الليلة لي كتضرب فيها جوج ديال الأعراس بلا بيه هو، في المقابل هو كيبيكي في الستوريات وكيقول غادي نرجع مراتي.