عمر المزين – كود//

هاد السيمانا غادي يبقى عدم الاستقرار الجوي. اي الشتا والريح والرعد…. هاد لشي اللي اكداتو ل”كود” الارصاد الجوية. الحسين بوعايد المسؤول على التواصل فهاد المؤسسة، فسر ل”كود” اسباب هاد الشي. قال باللي هاد الشي نتيجة “منخفض جوي علوي نشط مع شي كتلة هوائية باردة كاينة فالطبقات العليا”.

يوعابد ذكر باللي تيارات رطبة أطلسية ومتوسطية كتغدي حالة عدم الاستقرار فالمغرب مع الشتا أو شي قطرات كتكون أحيانا رعدية، وهادشي كاين فوق السهول الشمالية والوسطى، والريف، والأطلس وسهوله الغربية المجاورة، وسايس، وهضاب الفوسفاط وأولماس، وغرب الواجهة المتوسطية.

من نتائج هاد الشي، حسب بوعايد لـ”كود”، غادي يطيح بزاف الثلج فجبال الاطلس والريف اللي طولها فوق 1400 متر وغادية تكون الريح نسيبا قوية فمناطق المملكة الاطلسية وحتى المتوسطية والاطلس والمناطق الشرقية والجنوبية وفشي بلايص وسط المملكة

وزاد فتصريحو ل”كود” باللي الطقس غيستقر شوية الخميس والجمعة للي جايين، وخا غتصب الشتا فاقصى الشمال وشرق البلاد وغينزل الثلج فمرتفعات الأطلس المتوسط وغادية تكون درجة الحرارة نازلة بزاف فهاد لبلايص وفالجنوب الشرقي والهضاب العليا.

الاضطربات غادية تعاود ترجع السبت الجاي، يضيف بوعايد ل”كود”، بسباب احتمال قدوم منخفض جديد.