كود -وكالات //

ديما كانت أعماق البحار مرتبطة بقصص وكائنات خيالية خصوصا فالأفلام والرسوم ، وعلى راسها أسطورة “الكراكن” اللي هضر عليها العالم الدنماركي Erik Pontoppidan فـالقرن 18، مني وصف واحد المخلوق بحري بزاف يقدر يجرّ السفن لقاع البحر.

دراسة جديدة ورّات أنه كاينين أخطبوطات عملاقة عاشو فالعصر الطباشيري، قبل 72 مليون عام. من بينهم نوع سميتو Nanaimoteuthis haggarti، اللي كان ممكن يوصل حتى لـ 19 متر، وهو قياس كبير بزاف مقارنة مع الأخطبوط اللي كنعرفوه اليوم، وكاين حتى نوع آخر قريب ليه، Nanaimoteuthis jeletzkyi، الشي لي كيبين بصح أن هاد الكائنات كانت  فديك الوقت.

العلماء اعتمدو على حفريات ، خصوصاً “المناقير” ديال هاد الأخطبوطات، حيث ما عندهاش عظام باش يبقاو مع الوقت. هاد المناقير بانت واكلة الدق، الشي لي كيدل أنها كانت قادرة تهرس فرائس قوية وخا عندها لعظام ،يعني كانت مفترسات كبار فالبحر.

حتى كاين احتمال كانت كتواجه كائنات بحرية كبيرة بحال Mosasaurus، اللي كان من أخطر الزواحف البحرية فداك الوقت. وزيد على هاد الشي، كيبان أن هاد الأخطبوطات كان عندها ذكاء عالي، بحال الأخطبوط ديال اليوم.

فالأخير، كيبان أن أسطورة الكراكن ما كانتش بعيدة بزاف على الحقيقة، وتقدر تكون مبنية على كائنات حقيقية خلات الناس من زمان خايفين منها.