كود ـ أغبالو//

خرج الأب ديال موحمادينو فتصريح مؤثر كيشكّر فيه الجمعية المغربية لحقوق الإنسان اللي قال إنها وقفات معاه فهاد الملف وكيطالب مساندة حتى الجمعيات ديال حقوق الطفل وكيأكد باللي القضية محتاجة المتابعة باش الحقيقة تطلع كاملة وما يبقاش فيها غموض.

الأب شدّد على أن التشريح اللول ضروري نعرفو شنو فيه، وأن التشريح الثاني تعطل بلا منعرفو علاش، وهادشي خلق ضغط كبير على العائلة وخلى التساؤلات تكثر. وحتى مع هاد التأخير، كيأكّد الأب باللي القاتل معروف، وكيزيد يقول إنه كيتعرض لتهديد هو ومرتو وأن هاد التهديدات ما غاديش تخليه يسكت.

وكيضيف أب موحمادينو بلكنة أمازيغية :

“دابا أنا معندي دار، معندي فين نسكن، ماعندي والو، غادي نبقى نطالب بحق ولدي حتى لآخر لحظة… وغادي نطلع نعتاصم فالرباط حتى نموت، فالشارع وما غاديش نتنازل وخا يوقع لي وقع.”

الأب طالب القاضي لي مكلف بالقضية باش يزير ويحقق مزيان مع المتهمين، ويوجّه الملف لتعميق البحث والإجراءات، باش تطلع الحقيقة كاملة وتتحقق العدالة.

وفهاد الانتظار، الأب كيقول باللي دازت 6 شهور وهو كيتسنى، بلا أي توضيح رسمي، سوا من التشريح أو تقدم التحقيق، هاد الانتظار الطويل زاد فرتك شمل العائلة وكبر الجرح كتر مما هو كبير وكيخلي الظلم  يكبار نهار على نهار، خصوصاً فملف كيتعلق بروح دري صغير.

القضية اليوم ولات عندها بُعد إنساني كبير، والعائلة كتعيش ألم كبير ما كيتحملش، مابين انتظار الحقيقة والخوف من الإفلات من العقاب، دابا جميع الأنظار موجّهة للقضاء والتشريح باش يبان الحق.