كود – وكالات//

خرجو لالوفات د صبليون البارح السبت فمسيرة احتجاجية وسط مدريد على قبل شيبانية فعمرها 87 تطردات من البرطمة اللي عاشت فيها طول حياتها.

قضية ماريكارمن أباسكال رجعات أزمة السكن فإسبانيا للواجهة، من بعد ما البوليس خرجو الشيبانية من دارها، مورا ما فرعو الباب، فلقطة قلقات الراي العام.

وفالمسيرة لي كلاو فيها المحتجون العصا من طرف البوليس الإسباني، كانو لي خرجو كيطالبو بإجراءات كتحبس السومة الغالية ديال الكرا كيف ما طالبو بتزيار شروط إفراغ الكراية.

أباسكال، اللي ولات رمز للاحتجاج على أزمة السكن، دعات الإسبان للمشاركة فالاحتجاجات، ففيديو نشراتو على الإنترنت قبل ساعات من المسيرة.

وقالت من السبيطار، فين داوها: “بغيت اللي وقع ليا يكون عبرة باش ما يتعاودش مع ناس آخرين”.

https://x.com/CerveauxNon/status/2104108189092307193

وكانت أباسكال عايشة فهاد البرطمة لمدة 70 عام، قبل ما تاخدها شركة وترفع السومة الكرائية بـ275 فالمية، حتى ولات 2650 أورو، حسب أكبر اتحاد للمكتريين فإسبانيا.

الاحتجاجات كتزيد الضغط على رئيس الحكومة الاشتراكي بيدرو سانشيز، اللي كان واعد العام اللي فات بأن ملف السكن غادي يكون من الأولويات ديال حكومتو.

ومن المنتظر تصادق الحكومة على إجراءات سماتها “قانون ماريكارمن” لي كيجدد تلقائيا الكونطرة ديال الكرا وكتفرض شروط اخرى على عمليات إفراغ الكرايا.

وخا أن هاد الإجراءات ماشي مضمون دوز فالبرلمان حيث حكومة سانشيز ما عندهاش الأغلبية.