كود هناء ابو علي ////

كان نقاش كبير بزاف ففرنسا علاش المغرب رفض مساعدة باريس او ما طلبهاش فزلزال الجمعة 8 شتنبر الماضي اللي ضرب اقاليم الحوز وتارودانت وشيشاوة وازيلال ووارزازات ومراكش. لكن ما جبد حد بلد مدخلو المغرب فخانة “شقيق” ماشي غير صديق اللي هو المملكة العربية السعودية.

شفنا ان الرباط طلبات دعم الامارات العربية المتحدة ودولة قطر. دول اصلا مضاربين بيناتهم ولكن قدرات الرباط تجمعهم بقبول مساعداتهم. ما شفتاش دعم دولة قوية بحال السعودية.

السبب حسب مصادر “كود” ان الامارات العربية المتحدة ومعاها قطر كانت اول الدول اللي دعمات المغرب مباشرة. كان اتصال بين حكامها وبين رئيس الدولة مباشرة بعد الزلزال. كان اقتراح منهم يدعمو بلادنا فهاد المحنة. هاد الشي بان فتدوينات خرجوها حكام الامارات وقطر وفيها هاد الدعم لكبير

المملكة العربية السعودية حتى واحد فقيادتها لا ملكها ولا ولي عهدها كلف خاطرو يتاصل ب”البلد الشقيق” فهاد المنحة لكبيرة. كان اول بيان من السعودية لوزارة الخارجية ديالهم. هادي فالاعراف ديال الدول الشقيقة” راه اهانة. باش تكون علاقة اخوة ما يمكنش يكون اول بيان للخارجية. دازت ساعات عاد خرج ولي العهد تدوينة كيهدر فيها على زلزال الحوز ومن بعد كانت شي حاجة للملك. طبعا الملك سلمان صحتو على قد الحال ومعروف حبو للمغرب. غير هو ماشي اللي كيحكم دابا. كلشي بيد ولي العهد ولدو محمد بن سلمان.

مع الزلزال ديال الحوز بانت الازمة بين الرباط والرياض. ازمة صامتة. العلاقات ماشي حتى لهيه. بان بن سلمان صغير فهاد الفاجعة اللي ضربات المغرب.