كود الرباط//

كالعادة، غايتم افتتاح الدورة الأولى من السنة التشريعية 2023-2024 يوم الجمعة 13 أكتوبر 2023، بشروط صارمة كتعلق باللباس التقليدي وعدم حمل الحقائب والهواتف.

رئيس مجلس النواب الطالبي العلمي صيفط مراسلات لرؤساء الفرق والمجموعة البرلمانية، باش يخبر النواب يتلزمو باللباس التقليدي المتمثل في جلباب أبيض وسلهام أبيض وشاشية حمراء وبلغة صفراء وجوارب بيضاء بالنسبة للبرلمانيين، وجلباب أبيض وغطاء رأس أبيض بالنسبة للبرلمانيات.

إضافة إلى ذلك، ممنوع حمل أي حقيبة أو ما شابهها كيفما كان حجمها وعدم حمل الهاتف المحمول.

هاد اللباس ضروري فداخل قاعة الجلسات وأثناء حفل الاستقبال وحتى يسالي مراسيم الافتتاح اللي كيدشنو سيدنا وكيدير فيه خطاب كيحدد الأولويات الكبرى لي خاص الحكومة والبرلمان يشتغلو عليها وكيوضع النقط على الحروف بالنسبة للاختلالات لي كاينا.

الافتتاح العام جا فسياق استثنائي، أولا جاء مور الزلزال لي ضرب المغرب واللحمة بين الشعب وسيدنا فالتضامن والتآزر والتعاون باش تخرج البلاد من هاد الفاجعة، ثانيا جا بعد الخبر اللي علن عليه سيدنا بخصوص احتضان وتنظيم كأس العالم مع إسبانيا والبرتغال، ثالثا فسياق اجتماعات صندوق والبنك الدوليين لي كتحتضنهم مدينة مراكش لأول مرة فتاريخ القارة الإفريقية.