وكالات//

اعترف مدير العيادة اللي دار فيها الأسطورة الأرجنتيني دييغو مارادونا العملية الجراحية قبل ما يتوفى بأسبوعين فـ2020، نهار الثلاثاء، بلّي مارادونا كان كيشرب الشراب فالفترة اللي كانت من بعد العملية، وكان من الصّعب التعامل معاه، وهاد الشي خلا التعافي ديالو فالرعاية المنزلية ما يكونش مناسب.

ديميتروف، المدير الطبي ديال عيادة “أوليفوس”، قال بلّي طبيب الأعصاب ليوبولدو لوكي – اللي هو واحد من سبعة أطباء متابعين فالمحكمة – هو اللي طلب يتوفّر مكان باش يدير مارادونا فيه العملية فبداية نونبر 2020.

مارادونا دار العملية بعدما تبين أنه عندو ورم دموي بين الجمجمة والمخ، وبقى فالعناية المركزة من 4 حتى لـ11 نونبر، ومن بعد تنقل لدار باش يكمل فترة النقاهة، لكنه توفى فـ25 نونبر 2020، وكان عندو 60 عام.

النيابة العامة استندات على بزاف ديال الأخطاء اللي كانت فالرعاية ديالو فالدار كدلائل رئيسية ضد المتهمين، وحتى طبيب القلب شهد بلّي كان ضد فكرة إخراج مارادونا من عيادة أوليفوس.