وكالات//

هضر النجم العالمي براد بيت بكل صراحة على واحد المرحلة فحياتو اللي كان فيها بزاف ديال الضعف والانكسار، وكشف على تجربتو مع برنامج “مدمني الكحول المجهولين”   (AA)  اللي بدا فيه من بعد ما تفارق مع الممثلة أنجلينا جولي فـ2016.

وفاش حضر فحلقة نهار 23 يونيو من البودكاست “خبير الكرسي” اللي كايقدمو الممثل داكس شيبارد، رجع براد بيت يهضر على أول لقاء دار بيناتهم فواحد من اجتماعات AA، وقال بللي هادك الوقت كان نقطة تحوّل كبيرة فحياتو.

براد بيت اللي عندو دابا 61 عام، وصف هاد الاجتماعات بأنها كانت “رائعة”، وقال إنها خلات فيه تأثير كبير. وقال: “كان شي حاجة زوينة بزاف أنني نكون وسط رجال كيشاركُو الضعف ديالهم، والتجارب ديالهم، والألم اللي عايشين بيه، وكان حتى الضحك حاضر. بصراحة كانت تجربة مميزة بزاف”.

اعترف براد أنه دخل البرنامج فواحد الوقت اللي كان فيه “مكسور ومستعد يجرب أي حاجة”، وزاد: “كنت محتاج نرجّع راسي ونفيق جوانب مني كنت هملها. كان وقت صعيب بزاف”.

ورغم أنه فالأول كان حاس بشوية ديال الحشمة، قال إنه من بعد بدا كيرتاح وسط داك الجو اللي كيعاون، ومع الوقت ولات اجتماعات AA “حاجة كيتسنى يجي وقتها”. وتكلم حتى على تجربتو مع العلاج النفسي اللي كانت فهادك الفترة بالتوازي مع البرنامج، وقال إن الأسلوب ديالو فذاك الوقت كان “يائس”، لأنه كان باغي بأي طريقة يتجاوز هاد المرحلة.