كود – وكالات//

قاضي أمريكي علن، نهار الجمعة، ببطلان محاكمة الفرملية ليندسي كلانسي، المتهمة بقتل ولادها الثلاثة الصغار فـيناير 2023، فواحد القضية اللي دارت صداع كبير فأمريكا، خصوصاً بعدما الدفاع قال إنها كانت كتعيش حالة خطيرة ديال “ذهان ما بعد الولادة” منين ارتكابات الجريمة.

المحاكمة دامت د 6 سيمانات، ولكن هيئة المحلفين ماقدراتش توصل لحكم نهائي، بعدما وصلات المداولات لطريق مسدودة، وهاد الشي خلا القاضي وليام سوليفان يعلن بطلان المحاكمة، وفتح الباب قدّام إمكانية إعادة محاكمة كلانسي فـالخريف الجاي.

القضية كترجع لـ يناير 2023، ملي كلانسي، اللي كان عندها 36 عام، خنقات ولادها الثلاثة لي فعمرهم مابين 5 سنين و3 شهور.

من بعد الجريمة، كلانسي جرحت راسها بموس ونقزات ليطاج الثاني باش تنتحر، ولكن مماتش.

الدفاع ديالها حاول يقنع هيئة المحلفين بأنها ماكانتاش مسؤولة جنائياً على الأفعال ديالها، بسبب حالة “الحماق”، وقال بلي كلانسي كانت أم حنينة ولكن كانت كتعيش أزمة نفسية قوية خلاتها تفقد الصلة بالواقع.

فالمقابل، الادعاء ما نفاش أنها كانت كتواجه مشاكل نفسية، ولكن شدد على أنها كانت عارفة بأن قتل ولادها غلط، ومع ذلك قررات تدير هاد الشي عن قصد، وقدم خبرة ديال أخصائي نفسي قال فيها إن كلانسي كانت خططات للانتحار، وقتلات ولادها لحقاش كانت مقتانعة بأنهم غادي يعانيو من بعدها.

ومن بين الأدلة اللي ركز عليها الادعاء، أنها قبل الجريمة بوقت قصير صيفطات راجلها يجيب الماكلة ويدوز للفرماسي، بعدما حسبات فالتيليفون شحال غادي ياخذ د الوقت باش يرجع للدار.

المحامي ديال كلانسي، كيفن ريدينغتون، قال بلي الدفاع كيشوف فبطلان المحاكمة انتصار، وإن موكلتو مستعدة تواجه محاكمة جديدة إلا قرر الادعاء يعاود يتابع القضية.

الرئيس دونالد ترامب علق وقال إنه كيتوقع تكون محاكمة جديدة، كيف ما وصف ترامب القضية بأنها “درامية”، وقال بلي كلانسي دارت “حاجة خايبة”، وغادي تخلص الثمن.

فالمحاكمة، شهد الزوج السابق ديالها، باتريك كلانسي، بأنها عانات من مشاكل نفسية فالأشهر اللي مورا ولادة ولدها الثالث، وكانت كتقلب بشكل متكرر على العلاج وخذات مجموعة من الأدوية.

القضية رجعات للنقاش واحد الملف حساس فأمريكا: شنو كيوقع للنساء اللي كيدوزو من اضطرابات نفسية خطيرة من بعد الولادة، وكيفاش خاص القضاء يتعامل مع الأمهات اللي كيرتكبو جرائم ضد ولادهم فحالات كتكون مرتبطة بأمراض نفسية .