كريم الصوفي – كود//
تأثير الازمة بين البلدين وصل حد استثناء الصبليون من عملية “مرحبا 2021” واللي خلات موانىء اسبانية بحال ألميريا اللي يعتبر ثاني اكبر ميناء اسباني من حيث حركية نقل المسافرين يخسر اكثر من 500 الف مسافر. هاذ القرار كان ضربة قوية لاقتصاد المدن الاسبانية التي تعمل كحلقة وصل مع شمال إفريقيا.
كما قدرات صحيفة “ال موندو” الإسبانية الخسائر الاقتصادية للشركات الإسبانية المتضررة من القرار بحوالي 500 مليون أورو في المناطق التي تنتعش من حركية عملية مرحبا كل عام، اللي هي واحدة من أكبر تحركات الأشخاص في القارة الأوروبية، وكتشمل عبور أكثر من 3 ملايين مهاجر ومئات الآف ديال الطوموبيلات كل عام عبر التراب الاسباني.
استثناء الموانئ الإسبانية السبعة من عملية مرحبا 2021، كبد بزاف ديال الشركات ورجال الأعمال الصبليونيين خسائر مالية كبيرة وخلا أعمالهم مشاريعم كتواجه شبح الانهيار. عدد كبير منهم تشكاو من الكساد وقلة الحركة التجارية. المغاربة كانوا كيخسرو تقريبا 85 مليون يورو على الطرق الإسبانية.
عدد من الجورنالات نشرات هذاك الوقت، ربورطاجات على مشاريع تجارية صحابها كانو كينشو الذبان بسباب قلة الحركة. بحال السطاسيونات ديال الطريق السريع A-66 اللي كيختاروه المهاجرين المغاربة اللي جايين من فرنسا وبلجيكا وهولندا ومراكز التسوق التجارية على طريق الجزيرة الخضراء.
القرار المغربي كان مفاجأة للإسبان اللي تحرمو من مداخيل كتنعش الحركية الاقتصادية ديال بعض المناطق حال الجزيرة الخضراء اللي هي نقطة العبور الرئيسية اللي اختارها 3.34 مليون مغربي شاركوا في عملية 2019..