كود – سعيد الشاوي ////

اش واقع فاولاد عزوز ضواحي كازا اللي تابع ترابيا لعمالة النواصر. بدا من الاثنين ترياب ديال الهونگارات “غير القانونيين” فهاد المنطقة. شفنا كاع ترياب قصر بحال لكريملن لشي حد اسمو امحزون دكازا.

شفنا رئيس جماعة سابق سبق وتعزل هدد السلطات وبغى يحرگ راسو وعاق عملية التريبات لساعات. هاد الغبي مشى جاب لحوالا للكوري باش يقول للسلطات راه دايرو غير للفلاحة. حتى هاداك امحزون عوض ما يبني 200 متر مربع بنى كثر من 2000 متر مربع بلا رخص بلا حس القانون.

حيدو هونگار كان معمل للبلاستيك ولكن الغريب لحد الان هو خلاو اوزين ديال مورتاديلا فاولاد عزوز, “كود” تعاود تنشر فيديو كانت دارتو “شوف تيفي” على هاد الخرق الفاضح قبل عملية الترياب باسابيع.

دابا هاد المعمل غير القانوني اللي كيملكو فالحقيقة سمسار ملايري كيوظف الصحافة لمصالحو وكاتبو لامو ودايرة فيه مراتو هاد المعمل وكتقول باللي كتعطي رشوة ل”اونسا” شهريا، باش يعطيوها التيقار. هاد المعمل ما قرب منو حتى حد فالسلطات واخا قرار الهدم صادر فحقو، حسب مصادر “كود”.

اخطر من هاد الشي، حسب مصادر من السلطات المحلية ل”كود”، فهاد السمسار المعروف بتحديه لوزير الداخلية عبد الواحد لفتيت، جا قدام كلشي وخرج ماكينات كان خدام بيهم.

باغي يدير بحال رئيس الجماعة السابق. يخوي الهونگار ويجيب ليه لبهايم ويقول ليهم راه ما فيهش وحدة صناعية. الغريب ان هناك شي وحدين فالسلطات متواطئة معاه وكتشوف هاد الشي وساكتة.

حسب مصدر “كود” دائما، خطة هاد السمسار هو يعطل ويريب هو. شفتو التسيب فين وصل. هاد الهونگار وفالحقيقة كاينين جوج، كاين فالطريق بين شاطئ دار بوعزة ومدينة الرحمة.

خاص ولاية كازا ترسل لجنة لاولاد عزوز وعمالة النواصر باش تحقق مع المتواطئين.

ها فيديو الوحدة الصناعية غير القانونية فوق ارض فلاحية. شوفو شحال من عام وهي خدامة وكلشي متواطئ معاه. فضايح خانزة