كود كازا//

نايضا وسط وزارة التعليم العالي والبحث العلمي وتكوين الاطر، بعدما تسربات معطيات تفيد بلي نايضا حروب على ريع المناصب والصفقات.

الوزير الجديد عز الدين ميداوي، مزال مسخنش بلاصتو، وبداو مقربين منو كيروجو لأسماء باش يشدو مناصب رؤساء جامعات عندهم شبهات كثيرة وحتى فالتكوين ضعاف، معروف عليهم بلي مقابلين ريع الايام الدراسية والفنادق الفاخرة.

اخر حاجة تسربات، هو ترويج الاسم المرشح لي غادي يتعين فالمجلس الحكومي لي جاي، وهو زغلول رئيس جامعة محمد الأول بوجدة كيدعي في جلسات خاصة ان تعيينه موجود في الأمانة العامة الحكومة وانه ينتظر الاعلان عليه وان له ضمانات.

دبا واحد مدار والو فجامعة وجدة باغي يعاود يشد المنصب، وهادي كارثة للتعليم العالي خصوصا النتائج الهزيلة التي حققها في الولاية ديالو لي عرفت إعادة صباغة بعض المدرجات فقط وكثر التكوينات الخارجية لي معندها لا حسيب ولا رقيب وكتكلف الميزانية مبالغ كبيرة بزاف، ولي مستفيدين منها نوابه وزيد عليها سيارات فخمة وشراء شقق بمختلف المدن المغربية ولي الأغلبية ديالهم أساتذة الاعدادي.

رئيس الجامعة فرح يوم تعيين الميداوي وزير جديد وضمن العودة ديالوا حسب تعبيره وانه سيعين ضدا في الميراوي الذي رفض ملف ترشيحه.
والغريب كذلك ان احد الداعمين للوزير الجديد، هو حزب الحركة الشعبية، واخا فالمعارضة فرحان بتعيين ميداوي لأنهم كيستناو يرد ليهم مشاريع النوايا الجامعية.