كود كازا ///

ليلة البارح الاحد 25 ابريل 2021 كانت احفير نايضة فيها بسباب قهاوي كيفتحو بالليل وشي كيعطيو الشيشا. وفق مصادر ل”كود” فالسلطات خرجات البارح ودخلو لقهوة فشارع وجدة وسط المدينة. لقاوها مفتوحة ولكليان كيضربو الشيشا.

غير هاد الشي غادي يطور. احد المتضررين قدم رواية ل”كود” على ما وقع. قال باللي كان فقهوة مع لحداش الليل تقريبا واكد ل”كود” باللي لقهاوي تماك كتقدم خدماتها. واضاف ان السلطات قصدات غير هاد القهوة وخلات لخراين. مصدر من السلطات نفى ل”كود” هاد الشي وقال ان السلطات خرجات وما استثنات حتى شي محل.

اللي وقع فهاد القهوة٬ وفق نفس المتضرر فشهادتو ل”كود”٬ ان لكليان هربو لشي دار قريب من القهوة وتبعاتهم السلطات. واضاف مصدر “كود” ان هاد الشي خلق فتنة وان القوات العمومية ما حتارماتش الاجراءات المنصوص عليها قانونيا في عملية التفتيش أو الملاحقة ومنها المنصوص عليها صراحة في في المسطرة الجنائية خصوصا أن الجريمة ما هي مخدرات ما هي عنف او غيره بل خرق الطوارئ واستعمال الشيشة، وكان الأمر سيكون منطقيا لو امتثلت هاد القوات للقانون و استدعوا صاحب المنزل لتسليم الشباب المخالفين أو على الأقل توجيه تهمة له بإيوائهم، أو البحث عن هوياتهم أو انتظار خروجهم من البيت أو تحميل مسؤولية ذلك لمسيري المقهى بدون إحداث فوضى لا مبرر لها.

مصدر “كود” من السلطات اكد ل”كود” ان كلشي تم وفق القانون.

المتضرر اكد ل”كود” ان هاد الشي خلع كلشي وضرب حرمة المسكن اللي هو مبدأ كينص عليه دستور المملكة.