كود الناظور///

سيبة كبيرة كاينة هاد الايام فمدينة الناظور من بعد ما دخلو طوبيسات جداد للمدينة تابعة لشركة اسبانية، عندها حافلات مزيانين وكيحتارمو الانسان.

الطوبيسات تعرضوا لانتقادات شديدة من طرف المواطنين بسباب التعريفة، حقاش ثمن التذكرة طلع بزاف والخط لي كاين داير ثلاثة دراهم وجع بخمسة دراهم.

الاشكالية مابقاتش محصورة فغضب الركاب بل تعدات الى غضب ارباب الطاكسيات بمنطقة فرخانة المحاذية لمليلية المحتلة، بالاضافة لزملاؤهم فالعروي لي ماباغيينش الطوبيس يزاحمهوم وناضو كيحيحو.

طاكسيات فرخانة بدات كتهدد بالانزال والاحتجاج، اما طاكسيات العروي ناضو سدو الطريق وحتاجزو طوبيس ومابغاوش يطلقوه باش مايبقاش يزاحمهوم مطالبين بالغاء الخط.

هاد لبسالات سميتها عرقلة السير وكون دارها مواطن غايتعتاقل ولكن حقاش دارتها نقابة الطاكسيات كولشي ساكت عليها وباغيين يبقاو يديرو فالمواطن مابغاو.