الوالي الزاز -كود- العيون///

[email protected]

البارح تعين علي خليل واليا على جهة الداخلة وادي الذهب بلاصة الوالي السابق لمين بنعمر، وهاد لخبار طاح على شي وحدين بحال الصاعقة، كيصحابهم بلي الوالي بنعمر غادي يخلد فالداخلة، وكلشي كيتسناه يىجع يريگل ليه شي ضوسي ديالو.

الوالي لمين بنعمر لي مشا تقاعد ممكن نقولو بأن فترتو فالداخلة واخا طولات ولكن كان فيها بزاف ديال النقاط سواء سلبية أو إيجابية، وعلى العموم كانت مرحلة هادئة دازو فيها محطات كبيرة بحال ملف الگرگرات بشتى محطاتو من 2016 وملفات أخرى كبيرة فيها الإستثمار وملفات عندها علاقة بالوضع السوسيو إقتصادي والمنطقة، وملفات أخرى عليها هدرة كثيرة.

على العموم كانت مرحلة مقبولة، مرحلة تغولو فيها رجال الأعمال وولاو بعبع يأتون على الأخضر واليابس التاهمو گاع المشاريع وباقيين باغيين يزيدو بلا حشمة بلا حياء، ولكن واخا هكاك يكفي أن مرحلتو كان فيها نوع من الهدنة، ويكفي أننا نقولو أنه فأغلب الفترة ديالو ما سجلاتش الداخلة أي تدخل أو نقطة سوداء فمجال حقوق الإنسان، او تم فض شي حراك بالقوة، وهاذي تحسب ليه.

ما عليناش. لمين بنعمر مشا تقاعد ودابا غادي تبدا مرحلة جديدة مع الوالي الجديد علي خليل، لي كيتسناه بزاف ديال الملفات يعاود ينبش فيهم ويرسم ملامح مقاربة جديدة بعيدة على تغول شي ناس وهادوك لي كيحميوهم فالرباط.

علي خليل لي تعين واليا على جهة الداخلة وادي الذهب كيتسناه بزاف ديال الملفات واولها ملف القوارب المعيشية لي عطاها والي الداخلة السابق الحق في انها تخدم فمجال الصيد البحري قبل ما يتم التنكر ليهم ويخليو هاد الشباب عُرضة للشارع بلا خدمة بلا ردمة هوما وعائلاتهم، وهاد الملف هو اكبر عقبة غادي يلقاها، ولكن حلها بسيط بلا تعقيدات، وهو يخليو شباب المنطقة يخدمو خصوصا وأن قطاع الصيد البحري هو ملاذهم الوحيد وهو الثروة ديال المنطقة، وخدمتهم فهاد المجال غادي تنعاكس على مئات العائلات لي غادي يتحسن وضعهم السوسيو إقتصادي بدون أدنى شك.

ومن بين هاد الملفات لي كتساين الوالي الجديد ملف ضسارات شي منتخبين وشي برانيين على المنطقة جاو خلال فترة لمين بنعمر بالباراشيت وتحولو فظرف خمس سنوات لرجال أعمال كبار. كيفاش ؟ ما نعرف. تحولو بين ليلة وضحاها لمستثمرين فمجالات الصيد البحري واستافدو من مشاريع كبيرة فمركز الإستثمار وخداو عقارات بالهكتارات ودارو لوطيلات وبنادم فالداخلة باقي كاري وزايدون ممنوع عليه يحدم فقطاع الصيد البحري بحال صحاب القوارب المعيشية.

هاد المنتخبين وهاد رجال الأعمال لي عمرنا سمعنا بيهم حتى جاو للداخلة للأسف ولاو مالكين الداخلة وحاشيتهم هي المتحكمة فشريان إقتصاد الداخلة على حساب المواطن البسيط. آه بسيط وفقير وما عندو والو بلا هادوك التصاور لي كنشوفو. الداخلة راه ماشي هي بطولات الكيت سورف ولوطيلات لي حدا البحر. الداخلة راه بحالها بحال اي مدينة مغربية أخرى فيها فقر وفيها معاناة وفيها ناس بغات تقتاحم ديور كيتبناو باش يهربو من الكراء وهذا ضوسي بوحدو حتى نشوفو شكون لي غادي يستافد من هاد السكن.

علي خليل خاصو يوضع حد لهاد التسيب ديال هاد المنتخبين وهاد رجال الأعمال وهادوك المهرجانات لي كيضربو بيهم الگوامل تحت الدف بإسم الوطنية وجملة من طنجة للگويرة، وهوما لي جايباهم هي الإستفادة ويضربو الصرف بلا ما يكون عند أنشطتهم حتى شي معنى ولا إنعكاس على المنطقة ولا ناسها.

بالإضافة لهادشي لي ذكرنا، كاين ضوسي أراضي وبقع امهيريز لي حدا الميناء الأطلسي لي تفرقات على الحاشية وشدوها وبقات مجمدة، وعي البقع والاراضي لي كانوا كيحجو ليهم البرانيين من طنجة وكازا والرباط وأگادير واستافدو منهم شي وحدين بصفة رجال اعمال ومستثمرين وصحافيين وغيرهم، فالوقت لي ولاد البلاد والمنطقة مُغيبين عن المشهد من غير فئة قليلة من المحسوبين على باك صاحبي.

هاد الضوسي وواخا الفاس طاح فالراس خاصو يتحل، وحلو هو أن الوالي الجديد يُلزم هاد الناس يبنيو ويعمرو المنطقة ويكون حازم فالتعاطي لهاد الملف ولي ما بناش تحيد منو البقعة وتعطى لواحد آخر باغي يخدم وعلى قد المسؤولية.

الأيام الجاية غادي تورينا خدمة الوالي الجديد علي خليل وكيفاش غادي يدير مع هاد الضواسا وكريقة تدبيرو ليهم وولش فعلا قادر يوقف هاد التغول ديال هاد المنتهبين وهاد رجال الأعمال لي ما كتربطهم بالمنطقة غير الفلوس.