كود هناء ابو علي كازا ///

كازا مدينة بلا ثقافة او بلا مهرجانات كتشبهها. كتلبي اذواق سكانها بتنوعهم الجغرافي بحجمهم. كازا مدينة معدومة ثقافيا. حتى معرض الكتاب الدولي ديالها وقع عليه السطو من قبل الرباط فعهد الوزير الحالي للثقافة محمد بنسعيد. نتمناو يرجع لكازا باش يمشي من الوزارة.

الخطورة فكازا ماشي هاد الفقر فالمهرجانات. ماشي بناء مسرح كبير مازال مسدود حتى واحد ما عارف وقتاش يتفتاتح ولا شكون يفتاتحو بلا ما نهدرو على تدبيرو.

فهاد لمدينة الاكبر فالمغرب حتى ايلى كانت شي مبادرات خاصة موراها شركة صغيرة وقررات دير حفل لشي فنان٬ كيجي عامل بحال عامل انفا دادس ويمنع الحفل كيف دار فسهرة مغني الراب الفرنسي بوبا وغير باش يدير الخاطر لمنظم حفلات منافس باغي حتى هو يجيب رابور منافس ليه. فاللخر تمنعو بجوج والخاسر كازا. جمهور كازا

هاد العامل والباطرون ديالو الوالي كيحگر على شركات صغيرة باغية تجيب للجيل الجديد لكازا مغني كيعجبهم٬ ولكن كيعطي ترخيص لمهرجان لملايرية “دجازا بلانكا”.

هاد المهرجان اللي شادو مدير تجاري اييه المدير العام ديالو مدير تجاري. يعني همو اللول والاخير ماشي الموسيقى ولكن البيع والشرا. العامل ومعاه الوالي حميدوش اللي كيعيش غير مع لملايرية من ايام دخل ل”سان بيتش”٬ عطى كاع الرخص الممكنة لهاد البياعة والشراية باسم الثقافة.

دجازا بلانكا كدعمو مؤسسة عمومية وهي “سي جي اي” التابعة لصندوق الايداع والتدبير. هادو ما كيدعموش مهرجانات موجهة لشعبية. مؤسسة عمومية كتكره شعبية. كيهمها غير لملايرية. هادي حالة خاصة فبلادنا.

الغريب ان هاد المهرجان اللي شراه نفس الشخص اللي شرا مهرجان “طنجة جاز” وكيدير طابلة ب15 مليون ل3 ايام صافي اي 5 المليون سنتيم للنهار وكيدخل فليسات فرخصة عطاتها ليه السلطات ديال البيرا واخواتها والماكلة. ماشي ضروري يبيعها٬ كيبيع التيكي بيها.

ول البارح لخميس 22 يونيو 2023 بدا هاد المهرجان فهاد المدينة المقفرة ثقافيا. غالبية حضورو كانو اجانب. وكالة المغرب العربي للانباء زمن المدير الجديد عارف خصص ليها قصاصة طويلة شوية. كيدعم حتى هو هاد النوع من الثقافة لجمهور نخبوي.

هاد الوكالة بوقاحة كتبات وهاد الشي كذوب طبعا “مهرجان جازبلانكا أضحى اليوم ضمن قائمة المهرجانات الدولية الكبرى، حيث يساهم منذ 2006 في تنوع المشهد الموسيقي والثقافي بالمغرب”.

ما عمرو كان مهرجان كبير ولا كان ضمن المهرجانات لكبار. هادا مهرجان تجاري كولو بيع وشرا وممنوع على بيضاوا يقربو ليه ايلى ما خلصوش. علاش تكذبو وتسوقو معطيات خاطئة على مهرجان خاصو اولا يحيدو ليه الاسم. هادي بيعة وشرية دايرينها شي وحدين كانو مدراء تجاريين باش يجمعو لفلوس. الثقافة اخر همهم.

هاد النوع من المهرجانات فمدينة بلا ثقافة راه استفزاز. كيعطي صورة فين غادية لبلاد. غادية للحيط مع امثال البياعة والشراية واللي كيزوق فخدمتهم