كود – وكالات//

فمدينة أوستند ببلجيكا دار واحد المطعم اسمو Brassi Terrace Beach موني vip خاص بالكلاب, البلان مأنسبيري من ريسطورات “ميشلان”، وهاد الشي خلاه يلقى إقبال من عند عشاق الحيوانات .

الفكرة جابتها مولات المطعم، كيلي فان لو، لي تأثّرات بتجربة عاشتها فموناكو الصيف لي فات، منين لقات مطعم كيوفر موني خاص بالكلاب، وقررات تنقل نفس الفكرة لبلجيكا بطريقة أكثر تطور حيت ولى المطعم كيقدم وجبات متنوعة للكلاب، فيها اللحم ولا الحوت ولا الدجاج مع خضرة طرية، وبمقادير مدروسة باش تكون صحية ومتوازنة.

وماشي غير هادشي، كاينين حتى اختيارات إضافية بحال عظام ديال التغزاز بقياسات مختلفة كتناسب جميع السلالات، من الكلاب الصغار حتى الكبار، وزيد عليهم حتى صدر البط لي بغا يبرع كلبو.

ومني طلقات هاد الخدمة، عرفات إقبال كبير، حتى ولاو  90% من الكليان ، كيجيبو كلابهم يجربو هاد الموني، وخا هكاك المطعم محافظ على قانون “للكبار فقط”، يعني ممنوع دخول دراري صغار ، باش يكون جو مكالمي ومريح للكليان، هاد الفكرة لقات تفاعل إيجابي، وولات كتأكد أن الاهتمام بالحيوانات الأليفة ولى جزء من روتين الحياة ديال اليوم .