كود كازا ///

وزير العدل الفرنسي جيرار دارمانان وصل للرباط هاد لعشية السبت 8 مارس 2025. وحسب مصادر “كود” من العاصمة الفرنسية فالمسؤول الحكومي اللي كان وزير للداخلية فالحكومة السابقة٬ غادي يتلاقى برجال اعمال مغاربة. حسب نفس المصادر ل”كود” فمن المتوقع يتلاقى بمحمد الكتاني الرئيس المدير العام للتجاري وفا بالاضافة الى رجل الاعمال والوزير السابق مولاي حفيظ العلمي اللي شرا من عند لفرانسيس فرع الشركة العامة للابناك بالمغرب. وغادي يتلاقى بشي فرنساويين فالمغرب

علاش هاد اللقاء؟ ما معروفش. غير وزير عدل يتلاقى برجال اعمال مغاربة سبق لفرانسا عطاتهم اوسمة يمكن عندو علاقة برغبتو باش يترشح للرئاسيات الفرنسية المقبلة.

المسؤول الفرنسي٬ حسب البرنامج الرسمي كيف قالتو وزارتو =العدل=٬ غادي يوجدو ليه لمغاربة فطور رسمي حتى لغدا الاحد ونهار الاثنين غادي يبدا لقاءاتو الرسمية بوزير العدل عبد اللطيف وهبي والرئيس المنتدب للسلطة القضائية عبد النباوي والحسن الداكي الوكيل العام للملك لدى محكمة النقض رئيس النيابة العامة