كود – وكالات //

من بعد  الضربات القوية اليوم السبت فصباح لي توجهات لإيران  من طرف اسرائيل ومريكان ، تعلن فالعشية على موت المرشد علي خامنئي فغارات جوية على طهران  ، بزاف ديال الناس كيسولو  شكون هو المرشد الإيراني علي خامنئي؟

آية الله علي خامنئي لي مات على 86 عام، كيتعتبر من الوجوه الأساسية فالثورة الإسلامية اللي دارت فإيران ،عام 1979 شدّ منصب المرشد الأعلى عام 1989 من بعد وفاة الخميني، مؤسس الجمهورية الإسلامية.

من داك الوقت وهو فهاد المنصب، يعني تقريبا  35 عام، وهو كيشرف على السياسات العامة فالبلاد وعلى السلطات الثلاث: الحكومة، البرلمان والقضاء. المنصب ديالو هو الأقوى فإيران، وحتى الرئيس كيكون أقل نفوذ منو.

خامنئي داز من بزاف ديال الأزمات، بحال احتجاجات الطلبة عام 1999، واحتجاجات 2009 من بعد الانتخابات الرئاسية اللي المعارضة قالت باللي مزوّرة، واحتجاجات 2019، ومن بعد حركة “المرأة، الحياة، الحرية” فـ2022 و2023 مورا وفاة مهسا أميني وهي فالحراسة بسبب قضية اللباس.

طول هاد السنين، كان  علي كيتعامل مع الأزمات بالقمع  وبالمناورة السياسية مرات أخرى، ولكن التحديات الأخيرة باينة كبر وصعب من قبل.

منين خدا المنصب، ما بقاش كيدير زيارات برا إيران ،آخر زيارة له خارجية كانت ف 1989 لكوريا الشمالية ملي كان باقي رئيس لإيران، وتلاقى تماك مع كيم إيل سونغ.

خامنئي ما كيحركش يدو اليمنى، حيت تعرّض لمحاولة اغتيال عام 1981 وخلّات عندو شلل فيها، السلطات الإيرانية حمّلات المسؤولية لمنظمة “مجاهدي خلق”، اللي كانت فالأول حليفة فالثورة ومن بعد ولات معارضة ومحظورة.

قبل الثورة، كان تعتاقل بزاف فيام الشاه بسبب النشاط الدعوي ديالو ،ومن بعد نجاح الثورة، ولى إمام صلاة الجمعة فطهران، وشارك حتى فالحرب الإيرانية العراقية.

عام 1981 ولى رئيس لإيران من بعد ما تقتل الرئيس محمد علي رجائي فهجوم منسوب حتى هو لمنظمة مجاهدي خلق،
فالثمانينات، كان آية الله حسين منتظري هو المرشح الأقرب باش يخلف الخميني، ولكن الخميني بدّل رأيو قبل ما يموت، حيث منتظري عارض الإعدامات الجماعية ديال المعارضين، من بعد وفاة الخميني، مجلس خبراء القيادة اختار خامنئي باش يكون المرشد الأعلى.

خامنئي خدم مع ستة رؤساء، من بينهم محمد خاتمي اللي كان معتدل وحاول يدير إصلاحات ويتقرب للغرب، ولكن خامنئي ديما كان كيميل للتيار لي كتشدد، وكيزير على العداء للولايات المتحدة اللي كيسميها “الشيطان الكبير”، وكيرفض الاعتراف بإسرائيل.

خامنئي عندو ستة ديال الأولاد، وأكثر واحد معروف هو مجتبى، اللي تحطّ فالعقوبات الأمريكية عام 2019 وكيعتبر من الشخصيات المؤثرة فإيران.

حتى العائلة ديالو فيها انقسام حيث ختو بدري هربات للعراق فيام الحرب، وولات معارضة للنظام، وبعض أولادها وأحفادها من أشد المنتقدين للجمهورية الإسلامية.