كود اشتوكة//

الجدارمية فاشتوكة، شدو موظف فجماعة أيت عميرة، كيشغل منصب “شسيع المداخيل”، وحالوه على المحكمة ديال الجرائم الأموال فمراكش فحالة اعتقال، لأنو تورط فاختلاس فلوس عمومية ديال استخلاص فواتير الما.

وفي التفاصيل قالت مصادر من المنطقة ل(كود) أن هاد الموظف كان مكلف باش يتخلص في فلوي الما منذ شي ثمانية ديال شهور، لكن بان أنو استغل هاد المهمة وعطل الحاسوب ديال الفواتير، ومن تما بدأ كيجمع الفلوس ديال حوالي 60 اشتراك بقيمة 18 مليون سنتيم، وكيعطي وصولات أداء مزورة للناس اللي كا يخلصو الما عندو.

وهاد القضية طاحت من بعد افتحاص فالجماعة كشف وجود اختلاس فالمبالغ المحصلة، ولكن محاولات تسوية الأمور بشكل ودي فشلات، وهو الشي اللي دفع لتقديم شكاية للنيابة العامة فبيوكرى.
هاد الملف داز من ابتدائية بيوكرى للاستئنافية ديال أكادير اللي بدورها أحالتو على محكمة جرائم الأموال فمراكش بحكم الاختصاص.

المتهم تقدم للعدالة، والهيئة القضائية قررات وضعو تحت الاعتقال الاحتياطي، فانتظار تعميق البحث قدام قاضي التحقيق لاستكمال المسطرة القانونية ومعرفة باقي التفاصيل ديال هاد الملف.