كود سبور- طشقند//

عبر لاعبو المنتخب الوطني المغربي، على الرغبة ديالهم فتحقيق الرباح على منتخب البرتغالي، فالماتش اللي غايلعبوه غدا الاحد ضد منتخب البرتغال برسم الجولة الثالثة من دور مجموعات كاس العالم، باش يتأهلو لثمن النهائي كمتصدرين للمجموعة 5.

وتكلم خالد بومزو لاعب المنتخب الوطني المغربي لكرة القدم داخل القاعة، وقال فتصريح له: “الماتش ضد البرتغال باين غايكون صعيب، عندهم فريق صعيب وهما بطل العالم وربحو آخر كوب ديموند، وغايكون ماتش مزير وغايتلعب على جزئيات بسيطة واللي مركز 40 دقيقة كاملة حتى الأخير هو اللي غايربح الماتش وبالنسبة ليا غايكون الماتش مزير بزاف”.

وكمل بومزو، وقال: “ما كاينش ماتش ساهل فهاد لاكوب ديموند وداكشي اللي دزنا منو ضد تاجيكستان حتى البرتغال دازو منو، وفالماتش ضد البرتغاليين غانلعبو على الرباح ونتأهلو حنا الاولين”

وقال أنس العيان لاعب المنتخب المغربي: “رتاحينا، اول مرة كانتأهلو من الماتش الثاني فدور المجموعات، وغانلعبو دابا ضد بطل العالم بحال كيفما لعبنا ضدهم فليتوانيا ودابا فأوزبكستان عندنا نفس الفكرة خاصنا نتأهلو الاولين باش المورال يكون مزيان ونلعبو ماتش الويتيام وحنا مرتاحين وراحنا خدامين ونتمناو المغاربة يكونو فرحانين بالنتائج”.