احمد الطيب – كود الرباط//

أمين التهراوي، وزير الصحة والحماية الاجتماعية الجديد، خدام في صمت بدون ضجيج ولا تسويق. “ما بغاش يخرج للاعلام وحتى البرلمان تسنى حتى يفهم القطاع ويستوعب الملفات” يشرح احد مساعديه ل”كود”. عليها خرج فالبرلمان غير هادي ايام

الوزير كيف قال احد معارفو ل”كود” جا يخدم. “كيعرف غير الخدمة”. فخدمتو كيركز بزاف على “الحكامة” “عليها كانت قراراتو اللوى كتعلق بالحكامة” يوضح مصدر “كود” ويضيف وفق اسلوبو “تم إلغاء عشرات الصفقات اللي مكانتش مدروسة مزيانة وفيه إشكالات تقنية واختلالات، وعلى رأسها صفقة ملف المريض اللي كان داير صداع فالكواليس بسبب المبالغ الثقيلة اللي كانت داخلة فيها. المسؤول الجديد على القطاع قرر يسد البيبان على التلاعبات، ويوحد مسطرة الصفقات باش يقطع الطريق على السماسرة والمتلاعبين” يشرح مصدر “كود”.

التهراوي، واخا خدم فالقطاع الخاص٬ عندو خبرة كبيرة فالحكومة. بداها فديوان عزيز أخنوش باش كان وزارة الفلاحة والصيد البحري وسالاها مسؤول ديوانو كرئيس للحكومة قبل ما يتعين علي قطاع الصحة. كيعرف مزيان خبايا الإدارة المغربية ودهاليز الوزارات” يشرح قيادي من حزب التجع الوطني للاحرار ل”كود”. باسم هاد الحزب دخل للحكومة.

واضاف مصدر “كود” اللي دوز من تجارب خلاوه يدخل لوزارة الصحة وهو فاهم اللعبة. فاهم الادارة. راه عندو تصورات واضحة على الإصلاح.

عندو ميطود مختالف على زملاؤو فالحكومة. باش بدا٬ يضيف احد مساعديه٬ ما دارش اعفاءات لمسؤولين سبق اثير اسمهم ففضايح٬ لان القطاع جديد عليه٬ دخل وعطى لكل واحد من اطر الوزارة فرصة جديدة. بغى يبدا معاهم صفحة جديدة. كيثيق فالموارد البشرية للوزارة. هو بدا الخدمة وباغي كلشي ينخارط معاه. طبعا اللي ما بغاش غادي يخرج بشكل طبيعي من هاد الدينامية يشرح احد معارفو ل”كود”.

كيعرف وزير الصحة ان المشكل الحقيقي فالقطاع ماشي هو قلة الأطر، وإنما سوء التوزيع والتدبير. حتى باش بغى يوجد اورگانيگرام جديد للوزارة كيتماشى مع ظهور وكالات جديدة بحال الوكالة المغربية للادوية والمنتجات الصحية والوكالة المغربية للدم وحتى المجلس الاعلى للصحة٬ خدا وقتو٬ يشرح مصدر “كود”. دابا، التهراوي كيوجد بهدوء لإطلاق عملية هيكلة جديدة لقطاع الصحة (بقات ليها اسابيع قليلة تخرج)، بطريقة بعيدة على حملات التسويق، لذلك لحد الان هو ماخدامش مع حتى وكالة تواصل، مباغيش البوز والتصاور بزاف يشرح احد مساعديه ل”كود”.

هاد الوزير اللي تخرج من Sciences Po Paris (مع نفس الفوج ديال الرئيس الفرنسي إيمانويل ماكرون)، ما باغيش يدخل سياسة صيد الاطر او تصفية تركة ايت الطالب واخا خاصها تصفى كلها٬ واخا محسوب على حزب أخنوش كيشوف أن كاينين مسؤولين تعينو فحقبة الوزير السابق خدامين مزيان، وكيستحقو يبقاو فمناصبهم.

هاد الأسلوب ما كيعنيش انه متسامح. احد معارفو اكد ل”كود” باللي كيردد باللي هو “ماشي ظريف”. ماشي ضريف مع المتلاعبين ومسامر الميدة، وفق مصدر “كود” .

المهندس التهراوي عندو مشروع واضح: قطاع صحة منظم، بلا فوضى، بلا مفسدين، وبلا لوبيات كتتلاعب بفلوس الصفقات.

واش ينجح او لا؟ الحصيلة ديالو بعد ما يدوز فترة على القطاع٬ اللي غادية تحكم ؟ تنسناو نشوفو ميطود تهراوي لعلاج مرض قاصح متمكن من قطاع دار باش يعالج لمغاربة: قطاع الصحة