كود الرباط//

عجائب وغرائب حزب البام باقا مستمرة، هاد الحزب لي دار تخليطة عجيبة كيف ديما طبعا بانتخاب قيادة جماعية تتحكم فيها فاطمة الزهراء المنصوري بنت الباشا، لي أول حاجة دارتها هي تصفية الحسابات مع الخصوم، بحيث بدات بتحريك الاتباع ديالها ضد الأمين العام السابق عبد اللطيف وهبي وماخلاو ما قالو فيه من مقالات رأي وتجييش أعضاء الحزب ضدو.

هاد الحرب لي كانت قبل المؤتمر ديال انتخاب تخليطة القيادة الجماعية، راه مستمرة نفسيا وسياسيا ضد وهبي فجميع المراحل، خصوصا فالمواجهة ضد الإسلاميين لي طالبو باستقالته وإعفائه من منصب المسؤولية واتهموه بالفساد وخدمة أجندة خارجية.

وهبي لي كيواجه بوحدو الإسلاميين بسبب اقتراحاته ومرافعته الحداثية في كل مشاريع القوانين اللي خلقات ثورة تشريعية فالبلاد، بدءا بقانون العقوبات البديلة وقانون المسطرة المدنية (غير هذا ثورة بوحدو) وجايا فالطريق المسطرة الجنائية وقانون مهنة المحاماة ومدونة الأسرة وو. اليوم كيواجه عزلة داخل حزبو.

البام في عهد بنت الباشا، مشفناش مواقف حداثية تنتصر لروح العصر وتنتصر للقيم التأسيسية في حزب البام ولا لروح حركة لكل الديمقراطيين.

البام تخلا على وهبي جوج مرات، المرة الأولى مباغينوش يبقا وزير فالتعديل الحكومي، والمرة الثانية فنقاش مدونة الاسرة مكاينش دعم له.

ربما الاتحاد الاشتراكي والتقدم والاشتراكية هوما لي غايدعمو وهبي فإصلاح المدونة أما البام فراه ولى رجعي مع بنت الباشا.

ف2024 كان الحدث البارز، هو جلسة عمل حول تعديلات مدونة الأسرة اللي ترأسها سيدنا، بالقصر الملكي بالدار البيضاء، وللي حضر فيها رئيس الحكومة، وعرفت عروض قدمها وزير العدل، ووزير الأوقاف والشؤون الإسلامية، لتقديم المضامين الرئيسة لمقترحات مراجعة مدونة الأسرة وكذلك ملخص حول عمل لجنة مراجعة المدونة.

فهاد الحدث البارز، لي طلع الجوك سياسيا هو وزير العدل عبد اللطيف وهبي، للي كان مهدد بمغادرة سفينة الحكومة وكانت أيامه معدودة، خصوصا بعدما انقلبت عليه بنت الباشا بتحالف “غريب” مع تيار كازا بقيادة صلاح الدين أبو الغالي وتيار مراكش.

وهبي للي كان مهدد يخرج من الحكومة بعدما حيدوه من الأمانة العامة لحزب الأصالة والمعاصرة، واخا قال لمقربين منو بلي صافي غادي يمشي فحالو خصوصا وأن بنت الباشا مكانتش باغاه يبقا، رجع بقوة بعدما تمسك به رئيس الحكومة فالتعديل الحكومي الأخير.

وهبي بقا وأبو الغالي طار، ولعنة المتابعات القضائية في حق أنصار بنت الباشا مستمرة، وفضايح صفقات القيادي المدلل المهدي بنسعيد كانت شوهة لهاد الحكومة وباقي العاطي يعطي مع وجود تسريبات جديدة (قضية نتفلكس وكذلك كيفاش فيلم مشهور مبقاش تصور فالمغرب).

السؤال: علاش المكتب السياسي مكيدعمش وهبي فهاد الحرب للي تستعملات فيه كل أشكال الخبث السياسي والاتهامات الخطيرة من طرف الإسلاميين.