كود سبور//

كيعيش اتحاد طنجة حالة استنفار كبيرة فظل الوضع الطبيعي اللي كيمر منو الفريق وتزامن ذلك مع الماتش القوي اللي كيتسناه ضد الوداد الرياضي هاذ العشية فمؤجل الجولة 5 من البطولة الاحترافية لكرة القدم.

وحيث مواجهة الوداد الرياضي كتعتبر واحدة من قمم البطولة، قرر المكتب المديري ديال اتحاد طنجة يتلقى مع اللعابا ديال الفريق ويحاول يبين ليهم بلي راه معهم خصوصا وأن الماتش ضد بطل المغرب كيجي فظرف صعيب كيدوز منو ممثل البوغاز اللي انفصل على المدرب بادو الزاكي حيث خسر جميع ليماتش فالبطولة.

وعرفت الحصة التدريبية الأخيرة ديال اتحاد طنجة قبل ماتش الوداد، حضور رئيس الفريق محمد أحكان، اللي كان مرفوق بأعضاء من المكتب المديري من أجل تقديم الدعم للاعابا، والدفع من المعنويات ديالهم قبل المباراة خصوصا أن الخصم ثقيل، وجاي لطنجة باش يربح ويبقى فالصدارة.

للإشارة فالماتش ما بين اتحاد طنجة والوداد الرياضي غادي ينطلق إبتداء من الساعة 6 و15 دقيقة ديال لعشية الفتيران لكبير ديال مدينة طنجة، مع العلم أن الماتش غادي يتلعب بلا جمهور بسبب العقوبة اللي صدرت الجامعة على اتحاد طنجة من بعدما دارو محسوبين على جمهورو الشغب فالماتش الماضي ضد الفتح الرياضي.