علي الصافي كود كازا ////
البارح الاثنين 28 اكتوبر 2024 كانت احداث كبيرة فاسقبال محمد السادس للرئيس الفرنسي ايمانويل ماكرون بالرباط. هاد الشي لخصاتو صور وفيديوات. سيدنا بالعكاز وصحتو احسن بكثير من نهار تعيين حكومة اخنوش 2. سيدنا نزل حدا لاگار ديال الرباط المدينة فشارع محمد الخامس وسلم على مواطنيه. بقى الرئيس الفرنسي حال فمو باش شاف كيف محمد السادس كيتعامل مع شعبو. تعامل مباشر. شعب فرحان وملك ناشط. سيدنا طلب من ماكرون حتى هو يسلم. رئيس فرانسا جرب حرارة اللقاء وعفويتو وقوتو فنفس الوقت.
بعد الاستقبال الجماهيري الكبير كان فيه الاستقبال البروتوكولي. الخيالة داخلين فباب السفرا للمشور. هادي موحالش ينساها ماكرون بحال احداث كثيرة فهاد الزيارة. مشهد فيه حكاية ملكية ضاربة فالتاريخ بحال هادوك اللي كيصطى عليهم ماكرون. كلشي عندو طقوسو والكود ديالو. رئيس الدولة مع رئيس الدولة كيتقدموهم الخيالة. سمفونية رائعة. كتسحر العين.
سيدنا مع ماكرون فالقصر الملكي. سيدنا مع ماكرون فقصر الضيافة اثناء التوقيع على اتفاقيات بقيمة 10 ملايير اورو كتهم الهيروجين والتي جي في وصناعة الطائرات. حتى فهادي كانت صور زوين بين ملك ورئيس.
اخر صورة معبرة من لقاءات البارح هي للملك رفقة ولي العهد مولاي الحسن والرئيس الفرنسي والامير مولاي رشيد واقفين وحدا سيدنا لالة خديجة وفليسر ديالها لالة اسماء ولالة حسنا وبريجيت ماكرون ولالة مريم. فالاستقبال بالمطار كانت غير لالة خديجة ولالة مريم. صورة عائلية. بحال ايلى سيدنا كيقول لماكرون دابا باش درتي عقلك. راك وليتي من العائلة. هادي عندها رمزية كبيرة بزاف.
القصر تواصل بطريقة ذكية بهاد الصور. كلشي كان مزيان
سيدنا ديما كيتواصل ببيان رسمي مع لمغاربة بخصوص صحتو. ماشي اللي دار هاد الشي كولو فزيارة ماكرون البارح يوحل فبيان رسمي من الديوان الملكي يشرح ويوضح. يطمأن المغربي والمغربية.
لمغاربة فرحو ماشي باستقبال ماكرون ولكن بملكهم. شافو بصحة. وقف كثر من 3 سوايع من مطار الرباط مع الخمسة و10 دقايق حتى لعشا والتصويرة الزوينة اللي منشورة فهاد المقال. شافو باللي كاين تحسن. صحتو غادية وتتحسن واكثر من هادا شافو ملكنا مورالو طالع مزيان. شافو لالة خديجة متألقة وانيقة وراقية وزادو شافو ولي العهد وشوفاتو الصارمة.
