كود كازا ////

الطاشرون محمد بوزوبع مول “تي جي سي سي” كان غلاف “تيل كيل” بالفرنسية هاد السيمانا. طبعا خرجتو عارف لمن موجهها. هاد الطاشرون اللي ولى من مليارديرات لبلاد وثروتو فايتة 17 مليار درهم بعد ما طلعات بشكل كبير اسهم شركتو اللي ردجات فالبورصة ف2021 ب433 بالمائة.

بوزوبع عندو فيها كثر من 70 بالمائة. لكن الحدث ما كانش اش قال فحوارو مع “تيل كيل” لان ما عندو ما يقول، بل المگانة اللي دارها فيدو وبانت فصورتو فالغلاف. المگانة من ماركة “پاتيك فيليب” ثمنها كيفوق 200 مليون.

ممكن تقولو ملايري دار لفلوس ومن حقو يتمتع. غير هو من نهار عرض عليه مولاي رشيد فحفل العقيقة بالرباط وهو دافع كبير وكيحس براسو كلشي البيبان تفتحات ليه وباللي غادي ياخد مارشيات كثيرة مع تنظيم مونديال 2030 حقاش كيعتاقد باللي يحميه.

بوزوبع دخل للمغرب الفاسي النادي باش شركتو تولي مالكة ليه وفنفس الوقت باغي يكون رئيس لهاد النادي. كيبان غادي فطريق مول الزبل الرئيس السابق للرجاء البدراوي. كان يصول ويجول ويركب على اغلى الطونوبيلات ودابا راه فالعواكش.

ظهورو فالغلاف بديك المگانة فيه استفزاز. خاص الضمان الاجتماعي والضرائب يمشيو عندو ويشوفو واش كلشي مديكلاري فشركاتو لكثيرة وكلشي عندو حقوقو واش كيخلص الضرائب كلها ويجبدو ليه حتى ديك القضية اللي تجبد فيها على شراء طابلوات بالملايين من اوربا. ايلى كلشي عندو مقاد بصحتو يدير هاديك المگانة، ايلى كان شي تخربيقة يطبقو القانون عليه