كود – وكالات //

كشف استطلاع للرأي دارو معهد «إيفوب» الفرنسي لصالح مجلة «ماريان»، ولي نشر النتائج ديالو نهار الخميس 15 أكتوبر 2026، أن 46 فالمائة من المسلمين اللي شملهم الاستطلاع كيفكرو يخويو فرنسا ويستاقرو فبلاد أخرى، إلا ربحات مارين لوبان بالانتخابات الرئاسية المرتقبة فـ2027. ومن بين هاد الفئة، 20 فالمائة قالو إنهم غادي يخويو فرنسا إلا تحقق هاد السيناريو.

وبيّن الاستطلاع أن المخاوف ما كتقتاصرْش غير على الهجرة، حيث أكثر من 8 من كل 10 مشاركين مسلمين عبرو على الخوف ديالهم من ارتفاع الاعتداءات وأعمال التمييز ضدهم، إلا وصل حزب «التجمع الوطني» اليميني للحكم.

وكتجي هاد المخاوف فوسط النقاش السياسي اللي داير ففرنسا على الهجرة والإسلام والعلمانية، خصوصاً المواقف ديال الحزب من المظاهر الدينية فالأماكن العامة، ومن بينها المشروع اللي كيهضر على منع ارتداء الحجاب الإسلامي فهاد الفضاءات.

وبخصوص ردود الفعل المحتملة إلا تحقق هاد السيناريو، كشف الاستطلاع أن 27 فالمائة من المسلمين اللي تجاوبو معاه يقدرو يفكرو يخبيو الانتماء الديني ديالهم فحياتهم اليومية، اما 18 فالمائة يقدرو يحيدو الحجاب.

ومن جهة أخرى، قال الاستطلاع إن 21 فالمائة من مجموع المشاركين كيفكرو حتى هوما يخويو البلاد إلا فازت لوبان بالرئاسة. وطلعات هاد النسبة لـ40 فالمائة عند الشباب ديال الجيل «زد»، و43 فالمائة عند مؤيدي حزب «فرنسا الأبية» اللي كيقودو جان لوك ميلانشون، اما 44 فالمائة من المشاركين من الديانة اليهودية قالو إنهم مستعدين يفكرو فمغادرة فرنسا فهاد الحالة.

وكتجي هاد النتائج قبل الانتخابات الرئاسية الفرنسية ديال 2027، اللي مرشحة تعرف نقاشات قوية على الهجرة والهوية الوطنية والعلمانية والحريات الدينية.