كود مراكش//

رفعات محكمة الاستئناف فمراكش، اليوم الجمعة 28 نونبر 2025، العقوبات فواحد من أكثر الملفات لي خلقو الجدل فهاد العام، واللي معروف إعلاميًا بـ “شبكة الشواهد الطبية المزيفة”.

المحكمة قررات تأييد الحكم الابتدائي ولكن مع تشديد العقوبات، بحيث:

الطبيب (ف.أ) والمتهم (ج.ا) تحكمو بسنة ديال الحبس النافذ بدل ستة أشهر.

(ن.ل) تحكم بستة أشهر نافذة.

كاتبة الطبيب (ش.ا) تحكمات عليها هي الأخرى بالحبس النافذ.

أما باقي المتهمين، فالعقوبات ديالهم بقات بين موقوفة التنفيذ ونافذة حسب دور كل واحد فالقضية.

القضية بدات ملي تم توقيف الطبيب العام ومساعدته وجوج ديال الوسطاء ف9 شتنبر الماضي، من بعد ما توصلات الشرطة بمعلومات على شواهد طبية كتتبع فالكولوار بلا فحص طبي وبمقابل مالي.
التحريات بينات أن الوسطاء كانو كيوفرو شواهد جاهزة مختومة باسم الطبيب، والشرطة شدّاتهم متلبسين.

الطبيب ومساعدته تفرجو عليهم فالأول بكفالة (50 ألف للطبيب و20 ألف للمساعدة)، وتابعوهم فحالة سراح بتهم بحال: تزوير شواهد طبية، إصدار شواهد فيها معطيات كاذبة، المحاباة،

وانتحال صفة منظمة قانونا بالنسبة للمساعدة.

النيابة العامة تابعات باقي المتهمين بتهم المشاركة فالتزوير واستعمال شواهد كاذبة عن علم.