كود مراكش//

أيدات محكمة الاستئناف فمراكش، الحكم الصادر ابتدائيا فحق المتهمين فقضية ياسين الشبلي، اللي سبق وأدانت فيه المحكمة بعض عناصر الشرطة فقضية الوفاة ديال ياسين الشبلي اللي مات داخل كوميسارية بنجرير، وسط اتهامات ثقيلة بالتعذيب المفضي للموت.

المحامي رشيد آيت بلعربي أكد فتدوينة نشرها على فايسبوك، أن ’’ما تعرض له الضحية ما هو إلا عنف أثناء أداء الوظيفة”، وهادشي حسب المحكمة، اللي ما اعتبرتوش تعذيب كيفما كانت كتأمل العائلة وهيئات حقوقية.

هذ القرار كيجي فالسياق اللي مازال كيعيشو الشقيقين ديال الضحية، سعيد وأيمن الشبلي، حالة اعتقال منذ الخميس 26 يونيو 2025، وللي دارو عدة احتجاجات بهدف المطالبة بكشف الحقيقة فوفاة خوهم ياسين، وإنصاف العائلة، ومحاسبة المتورطين.

المحكمة الابتدائية ف بنگرير كانت أجلت النظر فالملف ديال خوت ياسين الشبلي ليوم 30 يونيو، بعد ما قدمو أمام النيابة يوم السبت. والهيئة المغربية لمساندة المعتقلين السياسيين شجبت الاعتقال واعتبراتو ’’تضييق ممنهج” على العائلة، بسبب تشبثها بمسار الحقيقة والعدالة.

يشار أن الحكم الابتدائي فالقضية الأصلية كان برّأ مقدم شرطة واحد، وأدان جوج آخرين بسنتين ونصف وثلاث سنوات ونصف على التوالي، وهو الحكم اللي اعتبراتو العائلة ’’ظالم‘‘.

فندوة صحافية كانت دارتها عائلة الشبلي، نهار 13 ماي الماضي، علنات أنها غادي تلجأ للهيئات الأممية، بسبب ما وصفاته بـ”تنكر” السلطات المغربية لحقها فالحقيقة، خاصة بعد ظهور معطيات جديدة من تسجيلات الكاميرات اللي وثقات لحظات التعذيب حسب تصريحاتهم.

العائلة اليوم كتكافح، من جوج جهات، ما حلتها الطعن فالأحكام القضائية اللي اعتبرتها ماشي منصفة، والجهة الثانية هي مستجد اعتقال جوج خوت آخرين فالعائلة.. ولكن كيبقى الأمل فغد أفضل قائم، على حد تعبير المحامي آيت بلعربي.