كود: مراكش ////

قررات غرفة الجنايات الاستئنافية بمحكمة الاستئناف فمراكش، البارح الأربعاء 17 دجنبر، تأجيل محاكمة كوميسير متابع بجنايات التزوير وطلب رشوة والتهديد، حتى لـ31 دجنبر الجاري، وذلك لإحضار المتهم والشهود.

الملف كيرجع فالأصل لشكايات تقدم بها مواطنين كيتهمو فيها العميد، اللي كان خدام رئيس الفرقة المحلية للشرطة القضائية بإيمنتانوت بالنيابة، بالتزوير والابتزاز والتهديد. الوقائع كتعود لسنة 2016، وكتتعلق بقروض ومبالغ مالية، ومعها اتهامات بطلب رشوة مقابل “البراءة” فملف قضائي، مع تسجيلات صوتية كتعزز الشكاية حسب المشتكين.

التحقيقات خلصات لوجود مؤشرات كافية، وتقررت متابعة العميد فحالة سراح من أجل جنايات التزوير فمحرر رسمي وطلب رشوة، وجنح التهديد، قبل ما تحال القضية على غرفة الجنايات. ورغم أن الجنايات الابتدائية كانت قضات ببراءتو فمارس اللي فات، فإن الملف رجع للاستئناف.

ومن جهة أخرى، العميد سبق وتدان فملفات أخرى مرتبطة بالتزوير وتعنيف شخص كان موضوع تحت الحراسة النظرية، بأحكام حبسية مختلفة ابتدائيا واستئنافيا، كما أيدت محكمة النقض قرار تجريدو نهائيا من مهام الشرطة القضائية بسبب اختلالات مهنية.

دابا الكلمة الأخيرة بقات مؤجلة حتى نهاية الشهر، فانتظار شنو غادي تقولو استئنافية مراكش فهاد الملف اللي جرّ وراه نقاش كبير.