كود – عثمان الشرقي //

فبلاغ خرج اليوم السبت ديال الحرس المدني الإسباني قال انه شد ستة ديال الناس اللي كيشكلو عصابة متخصصة فتهريب الحشيش من المغرب لجنوب إسبانيا باستعمال طائرات الهليكوبتر ،هاد الطيارات كانت كتقدر تنقل فاياجات بين 500 و900 كيلوغرام ديال الحشيش، واللي من بعد كانو كيتخباو فهونغارات وفارم فمالقة، ألميريا ومورسيا.

العملية اللي سموها “جيرو” خلات الحرس المدني يشد 657 كيلوغرام من الحشيش وخمسة أسلحة نارية و هليكوبتر  مستعملة فالتهريب، وكاينين جتى فلوس كتيرة وطموبيلات.
التحقيق بدا بعدما لاحظو تحركات مشبوهة فالليل بين مالقة وألميريا، شكو  فتهريب كبير لي من بعد   اكتاشفو أن العصابة كانت كتهرب الحشيش من المغرب بطريقة منظمة وبمساعدة ناس آخرين.

التهريب كان كيتدار بالطائرات الهليكوبتر، واللي من بعد كيتخباو فالمستودعات والمزارع فالمنطقة، ومن بعد كيتنقلو بالطرق البرية لدول أوروبية. الطيارات كانت كتهبط فمناطق الخاوية حدا ألميريا، وحاطين الناس باش يخويو الحشيش وينقلوه لكاميونات صغار لهونغارات كبار.

المتهمين الستة تقدمو للقضاء بتهم الاتجار بالمخدرات، حيازة أسلحة غير قانونية، والانتماء لعصابة إجرامية، العملية كانت بتنسيق بين الشرطة القضائية للحرس المدني، وحدة التحليل والاستخبارات لمكافحة التهريب (CRAIN)، الوحدة المركزية العملياتية (UCO) وفريق العمل السريع (GAR)، وشاركت حتى الشرطة المغربية والدرك الملكي البلجيكي والسويدي.