كريم الصوفي – كود//
[email protected]

حكومة كاتالونيا “جيناريليتاد” قررات تنقل تمثيليتها فشمال افريقيا من تونس للرباط. هاد الشي علناتو فيكتوريا السينا مستشارة الحكومة الكاتالانية المكلفة بالسياسة الخارجية. دابا الرباط مازال ما وافقاتش على هاد القرار.

المغرب ما وظفش ورقة الانفصاليين الكاتالان للي كاينين دابا فالحكومة الحالية المحلية٬ باش يضغط على الصبليون. الرباط ومدريد كيعيشو ازمة كبيرة على خلفية تبعات استقبال زعيم البوليساريو ابراهيم غالي هادي عامين بباسبور مزورة وهوية مختلفة. جا نتيجة لهاد الازمة اللي وقع فسبتة باش المغرب فتح الحدود للشباب والاطفال يدخلو لسبتة وصلو لشي 10 الاف.

غير هو هاد الشي ديال الكاطالان راه ما كيعنيش غير المغرب. هادو لحد الان غير تمثيليات وصافي. الدليل كانت هاد التمثيلية فتونس ودابا بغات تجي للمغرب وهاد العام بوحدو “جيناديليتاد” غادية تفتح 5 تمثيليات جداد بالاضافة الى تغيير الرباط بتونس٬ وهي: دكار بالسينغال وبريطوريا بجنوب افريقيا وبرازيليا بالبرازيل وطوكيو بالجابون وسيول بكوريا الجنوبية وكاين بلدان فيها ممثل خاص لهاد الحكومة بحال سلوفينيا وايرلندا وكندا واسكتلندا وبولونيو

لحدود 2022 حسب السينا٬ المسؤولة على السياسة الخارجية٬ كاتالونيا عندها تعامل مع 63 دولة ولكن ماشي كحكومة مستقلة بل كحكومة محلية ضمن السيادة الاسبانية

حسب جريدة “لاراثون” هاد الشي تزامن مع استمرار الازمة بين الدولتين وباللي هاد الخطوة ديال “السفارة” الكتالونية، من حيث المبدأ، ما غادياش تساعد فتطبيع العلاقات الدبلوماسية بين الرباط ومدريد.

حسب نفس الجريدة مدريد غادية تعارض افتتاح هاد التمثيلية الدبلوماسية. حزبا المعارضة: الحزب الشعبي وثيودادانوس وصف هاد التمثيليات ب “سلاح دعاية” للانفصاليين الكاتالونيين.

ولكن راه الحكومة الاسبانية ما غادياش تهدر على تمثيليات كاتالونيا وغادية تشد بزاف فديال المغرب