كود – وكالات//

طلعات حصيلة عملية الضرب بالقرطاس ف أستراليا، للي وقعات اليوم الاحد 14 ديسمبر، ف بلاج بوندي المعروف فمدينة سدني، لـ11 قتيل و20 مصاب.

الحادث طرا تقريبا مع الستة و45 دقيقة ديال العشية، فواحد الوقت اللي كيكون فيه الشاطئ عامر بالعائلات والسياح.

حسب البوليس جوج ديال الناس كانو مسلحين، واحد فيهم تقتل فالبلاصة بعدما تدخلات القوات الأمنية، والآخر داوه للسبيطار وهو بين الحياة والموت، البوليس دار براج أمني كبير وطلب من السكان يبعدو على المنطقة، خصوصاً من بعد ما لقاو قنبلة تقليدية الصنع فطوموبيل ديال واحد من المشتبه فيهم.

شهود قالو باللي الطلقات كانت قوية وتواصلات شي عشرة دقايق، والناس هربات وخلاو وراهم حوايجهم فوق الرملة، شي شهود شافو الجثث طايحة فالشاطئ، وواحد من سكان الحي قال لوسائل الإعلام: “الدم فكل بلاصة، الديكور صعيب بزاف”.

الهجوم جا فواحد اللحظة اللي كان فيها احتفال بعيد الأنوار ديال اليهود (حانوكا)، وهاد الشي خلا ردود فعل دولية، خصوصاً من إسرائيل اللي دانت العملية بقوة  من جهتها الحكومة الأسترالية عبّرات على الصدمة ديالها وقالت باللي التحقيق مازال جاري باش يتعرفو على الدوافع الحقيقية ديال هاد الهجوم.

هوية الجناة مازال ما توضحاتش بشكل رسمي وكامل، البوليس الأسترالي أكد باللي المهاجمين بجوج، واحد فيهم مات فمكان الحادثة بعد تدخل أمني، والآخر باقِي فحالة خطيرة وتحت الحراسة الطبية، والتحقيق مازال جاري معاه. السلطات شددت باللي أي معطيات على الأسماء أو الخلفيات خاصها تأكيد رسمي، وطلبت ما يتسرعوش الناس فالأحكام، خصوصاً حيث الملف حساس وكيتعلق بهجوم دموي عندو أبعاد أمنية وإنسانية خطيرة.