كود مدريد /////
عزيز اخنوش رئيس الحكومة المغربية فاختتام المنتدى المغربي الصبليوني بمدريد قبل قليل ان تحولا كبيرا وقع فالعلاقة بين الدولتين بعد اعلان مدريد دعمها للحكم الذاتي للصحراء واضاف ان الشراكة بين الدولتين تقوات بعد هاد الموقف الواضح واضاف ان تصويت مجلس الامن على القرار 2797 بخصوص الصحراء المغربية غادي يزيد يقوي هاد الشراكة الاستراتيجية و”حرر الطاقات” واسس لشراكة اكثر صلابة
رئيس الحكومة شدد على هاد الشراكة الاستراتيجية اللي كيقودها سيدنا وملك اسبانيا فيليبي السادس وذكر باللي المبادلات بين الدولتين ف2024 كانت 20 مليار اورو وباللي كاين توازن فالميزان التجاري
اخنوش اثار مجموعة من المواضيع فتدخلو اللي كان دعوة لمزيد من الحوار على اساس التكافؤ والند للند والمصالح المشتركة ولا غالب ولا مغلوب
ووجه خطابو لرجال الاعمال الصبليون وقال باللي بلادنا تتيح ليهم فرص كثيرة للاستثمار بل حتى المقاولات الصغيرة والمتوسطة الصبليونية مرحب بيها دابا وغادية تستافد من الدعم اللي كتقدمو الحكومة لمقاولاتنا. وذكر باللي 17 الف مقاولة صبليونية عندها علاقة اقتصادية ببلادنا
هاد العلاقات الهيكلية بين الدولتين مجتمعيا واقتصاديا والاصلاحات اللي دارها سيدنا تخلي بلادنا، يضيف رئيس الحكومة، فرص استثمارية كبيرة. واعتبر اخنوش ان التنظيم الثلاثي لمونديال 2030 =المغرب واسبانيا والبرتغال= مناسبة لشراكة فالبنيات التحتية والسياحة
وختم بالقول باللي الحكومة المغربية مستعدة لدعم استثمار الشركات الصبليونية
قضية الندية اشار ليهم اوسكار فوينتي وزير النقل الصبليوني فكلمة سبقات كلمة رئيس الحكومة. الوزير الصبليوني قال باللي الشراكة المغربية الاسبانية ماشي اختيار بل حاجة. حاجة خاصها العمل والتعاون ودافع على اختيارات حكومتو برهانها على هاد الشراكة الاستراتيجية.
