كود -اسفي //

تعرض الفنان الشعبي محمد ولد الصوبة، مع  أفراد من مجموعتو الفنية، لي من بينهم الفنانة عيشة الجيرارية، صباح اليوم السبت 20 ديسمبر  لكسيدة  خطيرة وهوما راجعين من سهرة فنية ناجحة كانت فمدينة آسفي ، الحادثة وقعات  فاللويحات دار القائد سي عيسى فطريق مراكش .

الكسيدة تسببات فإصابة خطيرة للشيفور، لي تننقل للمستعجلات باش يتداوى، اما  الفنانة عائشة الجيرارية تقاست فواحد الضلع، و بالنسبة  لمحمد ولد الصوبة فجاتو غير إصابات خفيفة وحتى الكمانجا ديالو بقات سالمة بالإضافة لدوزان ديال الجوق.

جميع المصابين دارت ليهم الإسعافات الأولية وتتنقلو للسبيطار الإقليمي فآسفي فين خداو العناية اللازمة، ودابا كيتسناو يستقر الوضع الصحي ديالهم، وسط متابعة طبية مستمرة.

هاد الحادثة دارت  قلق كبير فالساحة الفنية، خصوصًا بين الفنانين والمتتبعين ديال الفن الشعبي والتراثي، اللي عبّرو على التضامن ديالهم مع سمحمد ولد الصوبة ومجموعتو، وتمنّاو الشفاء العاجل لجميع المصابين ويرجعو فالقريب يطلّو على جمهورهم بصحة وعافية.

ولد الصوبة واحد من عمالقة العيوط دابا فالمعرب