كود سبور//

احتجو نهضة بركان على الفوضى اللي وقعت فالفينال ديال كأس الكونفدرالية ضد الزمالك المصري الاحد اللي فات فالعاصمة المصرية القاهرة، وگاع داكشي اللي وقع فيه من حوايج لا تشرف الكورة الافريقية.

وحسب مصادر “گود”، فالإدارة ديال نهضة بركان راسلت الاتحاد الإفريقي لكرة القدم للاحتجاج على مستوى التحكيم اللي كان فروتور فينال كأس الكونفدرالية الإفريقية اللي كان بين الفريق والزمالك المصري فتيران القاهرة الدولي، والقرارات التحكيمية المثيرة للجدل ديال الحكم السنغالي عيسى سي والبيلانتي اللي تحرم منو الفريق البركاني، بالإضافة إلى تقنية VAR اللي گاعما تدخلت باش تنبه الحكم للرجوع إلى اللقطات، وسط شكوك واش أصلا كان خدام VAR أو ما كانش.

الاحتجاج ديال نهضة بركان كان أيضا، على التنظيم الكارثي ديال الفينال، والصعوبات اللي لقاوها المسؤولين على النادي باش يوصلو لتيران القاهرة الدولي، لاهما لا الصحافيين المغاربة واضطرارهم للنزول من الطموبيلات والكار المخصص للإعلاميين ويمشيو لمسافات طويلة وسط جماهير الزمالك باش يدخلو للتيران.