الرئيسية > آش واقع > احتجاج قدام شركة دالصبابط فالبرنوصي بسبب استمرارها فالعمل واخا سجلات إصابات بكورونا.. والمندوب: هذشي ماكاينش.. الشركة سادة ودرنا التيست لبزاف
21/07/2020 14:30 آش واقع

احتجاج قدام شركة دالصبابط فالبرنوصي بسبب استمرارها فالعمل واخا سجلات إصابات بكورونا.. والمندوب: هذشي ماكاينش.. الشركة سادة ودرنا التيست لبزاف

احتجاج قدام شركة دالصبابط فالبرنوصي بسبب استمرارها فالعمل واخا سجلات إصابات بكورونا.. والمندوب: هذشي ماكاينش.. الشركة سادة ودرنا التيست لبزاف

عفراء علوي محمدي- كود//

صباح اليوم الثلاثاء، مجموعة من العمال اللي كينتميو لشركة لصناعة الصبابط فحي البرنوصي فكازا دارو وقفة احتجاجية قدام مقر الشركة، كيحتجو فيها على عدم إخضاعهم للتحليلات اللازمة، بعد ما علمو بإصابة 5 عاملين فالشركة بفيروس كورونا المستجد.

“كود” تواصلات مع أحد العمال ديال هذ الشركة اللي قال أنه غير 6 اللي دارو التيست، 5 منهم خرجات إصاباتهم إيجابية، بينما باقي العمال، اللي كيفوت العدد ديالهم 160 شخص، مادارو حتى شي تيست على الفيروس وماوقفوش الخدمة، وهذشي اللي أدى بيهم للاحتجاج. 

وكيقول العامل نفسو، فتصريحو دائما، “قالو لينا بللي رسلو ليست للجماعة باش يدوزو لينا التيستات وباقي الجماعة ماجاوباتش، وحنا مازال خدامين فالشركة لفوق، بينما لتحت سادينو على أساس راه الشركة تسدات بسبب الإصابات”.

وكشف العامل أن اليوم منين احتجو جات اللجنة ديال وزارة الصحة، وطلعو شافوهوم فين خدامين، واخا كاين قرار بإغلاق الوحدة الصناعية.

وفتواصل “كود” مع يافوت طارق، مندوب الصحة فعمالة مقاطعة البرنوصي، باش تستفسرو على هذ القضية، نفا كَاع هذ الهضرة، قال أن هذ الشركة “ما سجلات حتى شي إصابة فصفوف العاملين ديالها، لكن على الأرجح الإصابات تسجلات فصفوف أحد ليبرونش ديالها فالبرنوصي”.

وزاد يافوت كيقول أن شركة الأحذية اللي كاينة فالبرنوصي، واللي تسجلو فيها إصابات، راها مسدودة دابا “وممكن العاملين يكونو جاو ليها اليوم غير باش يتخلصو وياخدو بريمات العيد، حيت مايمكنش تخدم واللجنة خدات قرار بإغلاقها”.

وكشف المندوب أن الكوميسيون دازت للشركة، وبداو العاملين المخالطين كيديرو فالتحاليل.

موضوعات أخرى

08/08/2020 18:00

اليوم گاع الارقام طالعة.. 1345 مغربي ومغربية تصابو بكورونا و19 ماتو و642 تشافاو.. الطوطال: 32007 إصابة و480 توفاو و22190 براو.. و9337 مازال كيتعالجو

08/08/2020 17:30

هادي للمغاربة اللي باغيين يمشيو لاوربا. اش تغير فدول الاتحاد الاوربي باش حيدونا من اللائحة؟ فرانسا كتطلب تيست واسبانيا ما تبدلات والو وايطاليا خاصك لاكارانتين