عن صحف مشرقية//

فمشهد نادر وغريب وسط أجواء الحرب، خرجات فيديوهات كتوثق لخروج عدد من سكان بيت لاهيا فشمال غزة فاحتجاجات كيطالبو بوقف الحرب وبانسحاب حركة حماس من تسيير القطاع. الناس تجمعو قدام مخيم ديال النازحين، وبدّاو كيهتفو ضد حماس، بشعارات بحال ’’حماس برا برا”، وهما كيتساراو وسط الدمار قدام السبيطار الإندونيسي.

المثير فالانتباه هو الصمت الرهيب ديال قناة الجزيرة، لي معروفة بتغطيتها الموسعة لأي حاجة كتخدم أجندة الإخوان، ولكن هاد المرة دارت بحال ما شافتش، ومدارتش تغطية لهاد المظاهرات. كأن دوك المواطنين الفلسطينيين العزل للي مبقاوش باغين الحرب ورافضين حماس لا يستحقون التفاتة من قناة تدعي الوقوف مع الإنسان.

وماشي غير الجزيرة لي دايرة عين ميكة، حتى عدد من الإسلاميين ورافضي التطبيع المغاربة لي ديما كيبان عليهم الحماس فهاد القضايا، هاد المرة ساكتين، ولا واحد فيهم نطق، وهادشي لي كيأكد أن الولاء ديال الأغلبية ديالهم لحماس وماشي للفلسطينيين.

هاد الشي كيطرح أكثر من سؤال على ازدواجية المعايير وعلى التضامن الإنساني المزيف عند الكوفيين المغاربة، وعلى شكون فعلاً كيهمو الشعب الفلسطيني، وشكون غير كيركّب على القضية وقت ما جاتو الفرصة.

https://www.facebook.com/share/v/1ELk2MAAeB/?mibextid=wwXIfr