كود سبور//

كشفت مصادر “گود” أن المسؤولين بالرجاء الرياضي غايديرو اجتماع بسبب النتائج السلبية المتتالية اللي حصدها الفريق، ملي تعين المدرب البرتغالي ريكاردو سا بينتو.

ووضحت المصادر، أن عادل هالا رئيس الرجاء الرياضي والنائب ديالو عادل باقيلي غايگلسو مع المدرب ريكاردو سا بينتو، بعدما جمع غير 3 النقاط من 4 الماتشات مع الفريق، خداها من 3 التعدلات وخسارة، بلا ما يقدر يربح حتى شي ماتش، وآخر نتيجة سلبية كانت التعادل البارح فتيران العربي الزاولي مع المغرب التطواني بنتيجة زيرو لزيرو، وغايتناقشو معه أسباب أزمة النتائج ويوضح لهم شنو واقع بخصوص ما هو تقني.

الرجاء الرياضي بطل المغرب الموسم الماضي وكأس العرش، كايعيش أزمة نتائج حقيقية هذا الموسم وعدم استقرار فالطاقم التقني، وبدات الأزمة مع المدرب البوسني روسمي سفيكو بخسارة 2 ماتشات وتفارقو معه ورجع الاستقرار فالنتائج مع المدرب المساعد عبد الكريم الجيناني اللي ربح 3 الماتشات مع الفريق، قبل تعيين البرتغالي ريكاردو سا بينتو اللي مازال ما قدر يربح حتى ماتش واخا لعب 4 المباريات، والفريق دابا كايحتل المركز 9 بـ12 نقطة.