كود سبور//

ما بقاش المكتب المديري لحسنية أكادير غايدير اجتماع مع منخرطين النادي اليوم الاثنين، بعدما كان مقرر يتلقاو مع 9 ونص د الليل هذا المساء، باش يهضرو على الوضع الكارثي اللي كايعيشو الفريق هذا الموسم.

وحسب حسنية أكادير، فتقرر تأجيل لقاء المكتب المديري للنادي مع المنخرطين من اليوم الاثنين إلى يوم لاحق، بدون ما يتعرف السبب، في وقت كانت كل مكونات الفريق السوسي كاتسنى هذا الاجتماع لا علّى وعسى يخرج بشي مبادرات لإخراج الحسنية من الوضع الكارثي اللي غارقة فيه، وسط سخط جمهور الفريق بسبب حالة غزالة سوس.

ومحتلين حسنية أكادير المركز 13 فبطولة القسم الاول برصيد 22 نقطة، وهذا المركز إلى سالاو به هذا الموسم غايلعبو الباراج ديال الطيوح للقسم الثاني، وربحو حسنية أكادير هذا الموسم فالبطولة، غير 6 الماتشات من 23 ماتش، وخسرو وتعادلو 4 الماتشات وخسرو 13 ماتش.